Azərbaycan Dövlət İqtisad Universitetinin (UNEC) Dərbənd filialının 2023-2024-cü tədris ili üzrə məzunları diplom ala bilmirlər.

Bu barədə Musavat.com-a müraciət edən məzunlar bildiriblər ki, nə universitet rəhbərliyi, nə də Təhsil Nazirliyi (ETN) bu məsələyə aydınlıq gətirmir.

Onların sözlərinə görə, hər dəfə onlara "bu gün-sabah veriləcək" deyilərək gözlədilir, amma nəticə yoxdur. Bu müddət ərzində bəziləri iş tapa bilmir, bəziləri isə hərbi xidmətə çağırıldığı üçün 1 il 6 ay xidmət etmə riski ilə üzləşir.

Tələbələr bildirir ki, onlar bütün dərslərdə və imtahanlarda iştirak ediblər, yekun dövlət attestasiyasından müvəffəqiyyətlə keçiblər. Diplom almağa tam hüquqları var. Lakin nədənsə, bu hüquqları təmin olunmur.

“Bu qədər insanın həyatına təsir edən bir problemin nə üçün həll olunmadığı anlaşılmazdır. Diplomların gecikməsinin səbəbi nədir? Bu, sənədləşmə ilə bağlı problemdir, yoxsa başqa bir inzibati maneə var? Əgər hüquqi bir problem mövcuddursa, niyə bu barədə ictimaiyyətə açıq məlumat verilmir? Təhsil Nazirliyi bu məsələyə dərhal aydınlıq gətirməli və diplomların nə vaxt veriləcəyi ilə bağlı konkret tarix açıqlamalıdır”.

Məsələ ilə əlaqədar UNEC-in mətbuat katibi Elnarə Məmmədova bildirib ki, Elm və Təhsil Nazirliyindən diplom blanklarının təqdim olunmasını gözləyirlər: ” Rusiya vətəndaşlarına diplomlar artıq verilib. Digər məzunlara da blanklar Elm və Təhsil Nazirliyi tərəfindən veriləndən sonra təqdim olunacaq”.

Elm və Ali Təhsil üzrə Dövlət Agentliyindən (EATDA) bildirilib ki, agentlik tərəfindən tələbənin qəbulu, təhsil prosesi və digər məsələlər araşdırılır və qeyd olunan məqamlar qanunvericiliyin tələblərinə uyğun olduğu halda diplom blankları təqdim olunur:

“Qanunvericiliyin tələblərinə uyğun olmayan hallar aşkar olunduğu və Elm və Təhsil Nazirliyi tərəfindən müsbət rəy verilmədiyi hallarda diplom blanklarının təqdim olunması mümkün deyildir”.