Çinin avtomobil nəhəngi BYD "Hyundai"yə meydan oxumaq üçün Cənubi Koreyadakı satış şəbəkəsini ikiqat artırmağı planlaşdırır.

Valyuta.az xəbər verir ki, BYD "Hyundai Motor" və "Kia" kimi yerli markaların dominant olduğu Cənubi Koreya bazarında daha çox pay qazanmaq üçün satış şəbəkəsini genişləndirir. Şirkət Çin xaricindəki bazarlarda da satışlarını artırmağa çalışır.

BYD-nin Asiya-Sakit Okean regionu üzrə avtomobil satışları departamentinin baş meneceri Lyu Xuelyanq, cümə axşamı İlsan şəhərində keçirilən Seul Mobilite Sərgisində çıxış edərək "Koreyalı istehlakçıların tələbatını qarşılamaq üçün satış nöqtələrimizin sayını bu ilin sonuna qədər 15-dən 30-a çatdıracağıq" deyib.

BYD Cənubi Koreya bazarına nisbətən yeni daxil olub. Şirkət öz minik avtomobil markasını yalnız yanvar ayında "Atto 3" elektrikli idman avtomobilini rəsmi şəkildə təqdim edərək tanıdıb. Çinli nəhəng aqressiv marketinq və qiymət strategiyaları ilə tanınsa da, 2023-cü ildə "Hyundai" və "Kia"nın birlikdə bazarın 75%-ni ələ keçirərək təxminən 1,2 milyon avtomobil satması səbəbindən ciddi rəqabətlə üz-üzədir.

Sərgidə BYD subsidiya nəzərə alınmadan 47,5 milyon von (təxminən 32.400 dollar) başlanğıc qiymətinə malik olan "Seal" orta ölçülü sedanını təqdim edib. Şirkətin Seul Mobilite Sərgisindəki stendi ən böyük və diqqətçəkən pavilyonlardan biri olub.

Bundan əlavə, BYD sərgidə ümumilikdə altı avtomobil modelini nümayiş etdirərək həm istehlakçılar, həm də media nümayəndələri üçün təqdimatlar keçirib.

Şençjen mərkəzli avtomobil istehsalçısı, 2025-ci ilə güclü başlanğıc edərək bu ilin ilk rübündə satışlarını ötən ilin eyni dövrü ilə müqayisədə 58% artırıb.

Son bir ay ərzində "BYD", əlavə ödəniş tələb etmədən modellərinə ağıllı idarəetmə texnologiyası və cəmi beş dəqiqəlik enerji yükləməsi ilə 400 kilometr məsafə qət edə bilən ultra sürətli şarj sistemi kimi mühüm yeniliklər əlavə edib.

Şirkət bu il 800.000-i ixrac olmaqla ümumilikdə 5,5 milyon avtomobil satmağı hədəfləyir.

Paşa Məmmədli