Nəqliyyat, Rabitə və Yüksək Texnologiyalar Nazirliyinə məxsus “Azerbaijan International Telecom” (AzInTelecom) Məhdud Məsuliyyətli Cəmiyyəti süni intellekt laboratoriyası qurmaq üçün səylərini davam etdirir.

Valyuta.Az xəbər verir ki, bununla bağlı MMC tərəfindən müvafiq işlər davam etdirilir. 

Məlumata əsasən, MMC daha öncə süni intellekt laboratoriyasının qurulması məqsədilə avadanlıq və lisenziyaların satın alınması ilə bağlı elan etdiyi tender üçün bu dəfə 7.7 milyon manat ayırıb. 

Xatırladaq ki, təxminən 12 gün öncə elan edilən tender üçün MMC tərəfindən 7.1 milyon manat ayrılmışdı.  

Görünən odur ki, MMC o qiymətə lazımi avadanlıqları təmin edəcək şirkət tapa bilməyib və məbləğ də məhz buna görə artırılıb. 

Qeyd edək ki, 21 aprel 2025-ci il tarixinə qədər davam edəcək tender üçün satınalma predmetinin ehtimal olunan qiyməti tam olaraq 7.177.300,00 AZN-dir.

Onu da əlavə edək ki, ötən ay Prezident İlham Əliyev “Azərbaycan Respublikasının 2025–2028-ci illər üçün süni intellekt Strategiyası”nın təsdiq edilməsi haqqında sərəncam imzalayıb.

Sərəncam Azərbaycan Respublikasında süni intellektin inkişafını sürətləndirmək, bu sahədə tədqiqatların aparılmasını təşviq etmək, süni intellekt üzrə informasiya texnologiyalarının və onların idarə edilməsi mexanizmlərinin təkmilləşdirilməsini, infrastrukturunun əlçatanlığını təmin etmək, habelə ixtisaslı kadr potensialını gücləndirmək məqsədilə imzalanıb.

Sənədə əsasən, “Azərbaycan Respublikasının 2025–2028-ci illər üçün süni intellekt Strategiyası” təsdiq edilib.

Rəhim