Bakı şəhərində ipoteka və kirayə mexanizmi çərçivəsində vətəndaşlara yeni mənzillər təqdim olunur. 

Valyuta.az xəbər verir ki, İpoteka və Kredit Zəmanət Fondu tərəfindən həyata keçirilən layihə çərçivəsində Binəqədi rayonu, Cəfər Xəndan küçəsində yerləşən yaşayış kompleksində ümumilikdə 213 tam təmirli mənzil satmaq öhdəliyi ilə kirayə mexanizmi ilə verilir. 

1, 2 və 3 otaqlı olmaqla təqdim edilən yeni mənzillərin aylıq ödənişləri 954 manatdan başlayır. Belə ki, bütün mənzillər yüksək keyfiyyətli tikinti materialları ilə müasir üslubda təmir olunub, elektrik enerjisi, qaz və su ilə tam təmin edilib. Kompleksdə geniş həyətyanı sahə, yeraltı qaraj, uşaq oyun meydançası, idman qurğuları, məktəb və uşaq bağçası mövcuddur. Ərazi metronun “Dərnəgül” stansiyasına yaxın – cəmi 50 metrlik məsafədə yerləşir və ictimai nəqliyyat infrastrukturu ilə əhatələnib.

Vətəndaşlar mənzil seçimini 8 aprel 2025-ci il tarixindən etibarən həyata keçirə biləcəklər. Vətəndaşlar təqdim olunan yaşayış sahələrinin siyahısı ilə bu keçid vasitəsilə tanış ola bilərlər.
 Müraciətlərin qəbulu və mənzil seçimi "Elektron hökumət" portalına ( www.e-gov.az ) inteqrasiya edilmiş Elektron ipoteka və kredit zəmanət sistemi vasitəsilə aparılır.

Yaşayış sahələrinin satmaq öhdəliyi ilə kirayəyə verilməsi, müraciət və seçmə qaydaları barədə ətraflı məlumatı Fondun rəsmi internet saytı (www.mcgf.gov.az), rəsmi YouTube kanalı (youtube.com/@ipotekavekreditzemanetfondu) və "1549" Çağrı Mərkəzi vasitəsilə əldə etmək mümkündür.