Bakı və ətraf ərazilərdə nəqliyyat yükünü azaltmaq və ictimai nəqliyyat sisteminin effektivliyini artırmaq məqsədilə iş qrafikinin dəyişkən rejimdə təşkili ilə bağlı mühüm addımlar atılması nəzərdə tutulur. 2025–2026-cı illəri əhatə edən yeni yanaşma çərçivəsində dövlət orqanları, təhsil və tibb müəssisələri, eləcə də digər hüquqi və fiziki şəxslər üçün fərqli iş rejimləri müəyyən ediləcək. Fərqli iş rejminin müəyyən edilməsinin ayrı-ayrı sektorlarda sahibkarlıq fəaliyyətinə necə təsir göstərəcəyi maraq doğuran məsələrdən biridir.

Valyuta.az xəbər verir ki, Milli Məclisin deputat Vüqar Bayramov İqtisadiyyat.az-a açıqlamasında deyib ki, dəyişkən iş rejimi sahibkarlıq sahəsinə ciddi təsir göstərməyəcək. O, yeni rejimdə iş vaxtının qısaldılmadığı, sadəcə vaxtların dəyişdiyi məsələsindən söhbət getdiyini bildirib.

“Dəyişkən is qrafiki dövlət tərəfindən müəyyən edilə bilər, amma özəl sektor üçün məcburilik yoxdur. Özəl sektor üçün iş vaxtı ilə bağlı yalnız tövsiyə xarakterli müraciətlər təqdim oluna bilər, amma şənbə və bazar günləri xidmət sektoru fəaliyyətini davam etdirir. Hətta dəyişkən qrafik olsa da belə, xidmət sektorunda, xüsusən də özəl sektorun xidmət sektorunda fəaliyyət davam edir. Bu baxımdan sahibkarların fəaliyyətinə xüsusi təsir göstərməyəcək”, - deputat V.Bayramov əlavə edib.

İqtisadçı ekspert Eldəniz Əmirov isə İqtisadiyyat.az-a bildirib ki, iş saatlarının və ya iş günlərinin qısaldılması sektorlardan asılı olaraq sahibkarlara müsbət və ya mənfi təsir göstərə bilər.

Onun sözlərinə görə, xidmət sektoru daha çox istirahət günləri və qısa iş günlərindən faydalana bilirlər. Lakin digər sektorlar, daha çox istehsal, emal təyinatı üzrə fəaliyyət göstərən sektorlar isə əksinə istirahət günlərinin və qısa iş günlərinin zəruri olduğu dövrlərdə daha az məhsul istehsal edərək öz gəlirlərini azaltmış olurlar:

“Hansı aylarda bayramlar, istirahət günləri daha çox olursa, xidmət sektoru bundan daha çox bəhrələnir. Hazırda dünyanın 90 faizdən artıq ölkəsində 5 günlük iş qrafiki əsas götürülür. Bəzi ölkələrdə isə və hətta bəzi ölkələrin müəyyən şirktətlərində isə 4 günlük iş həftəsinə keçid baş tutub. Bunun kütləvi olması üçün isə düşünürəm ki, ən azı 20 il vaxt lazımdır. Ölkələr daha çox iqtisadi cəhətdən inkişaf etdikcə 4 günlük iş həftəsinə daha tez keçmiş olacaqlar. Üçüncü dünya ölkələri isə daha uzun müddətə, bəlkə də 50 il üzərində belə bir qısa iş həftəsinə keçmək mümkündür”.

Qeyd edək ki, Bakı və ətraf ərazilərdə nəqliyyat yükünü azaltmaq və ictimai nəqliyyat sisteminin effektivliyini artırmaq məqsədilə iş qrafikinin dəyişkən rejimdə təşkili ilə bağlı mühüm addımlar atılması nəzərdə tutulur. 2025–2026-cı illəri əhatə edən yeni yanaşma çərçivəsində dövlət orqanları, təhsil və tibb müəssisələri, eləcə də digər hüquqi və fiziki şəxslər üçün fərqli iş rejimləri müəyyən ediləcək.

Xatırladaq ki, dünya təcrübəsində nəqliyyat sıxlığını azaltmaq üçün ən ideal iş saatları aşağıdakı kimi müəyyən edilib:

07:00–15:00 (Erkən başlayanlar üçün)

08:00–16:00 (Standart iş vaxtı)

09:00–17:00 (Ənənəvi iş rejimi)

10:00–18:00 (Gec başlayanlar üçün).