Çində pilotsuz sərnişin daşıyan hava aparatları üçün ilk sertifikat təqdim olunacaq.

Valyuta.az xəbər verir ki, Çin Mülki Aviasiya İdarəsi sərnişin daşımaq üçün nəzərdə tutulmuş pilotsuz uçan aparatlara istismar sertifikatı təqdim etməyə hazırlaşır. 

Sertifikatlaşdırma prosesi çərçivəsində "EHang" şirkətinin istehsal etdiyi "EH216-S" model hava nəqliyyat vasitələri təsdiqlənib. Bu modellər “eVTOL” tipinə aiddir və elektrik mühərriki ilə işləyir, həmçinin şaquli qalxma və enmə qabiliyyətinə malikdir.

Bildirək ki, "EH216-S" aparatı dörd sahə üzrə – standartlaşdırma, uçuşa yararlılıq, istehsal və istismar fəaliyyəti üzrə sertifikat alaraq bu sahədə beynəlxalq səviyyədə ilk nümunə kimi tanınıb.

Qeyd edək ki, model 16 elektrik mühərriki ilə təchiz olunub və iki sərnişin daşıya bilir. Maksimum yükdaşıma qabiliyyəti 220 kiloqram olan bu aparat saatda 100 kilometr sürətlə hərəkət edir və 21 dəqiqəyə qədər havada qala bilir. Bu müddət ərzində 35 kilometr məsafə qət etməyə imkan verir.

Sərvanə Rəmixanova