Bəzən adi bir kommunal sənəd gözlənilməz bir problemə çevrilə bilir. Xüsusilə də orada yazılan borcun sizə aid olmadığını düşündüyünüz halda problem daha böyük görünür. Bu kimi hallarda çoxları çaşqınlıq yaşayır və nə etməli olduğu barəsində çətinliklərlə üzləşir. Halbuki, hər problemin həll yolu olduğu kimi bu problemin də həlli olmalı, müvafiq addımlar atılmalıdır. Bəs əsassız yaranmış kommunal borcun silinməsi üçün hansı addımlar atılmalıdır?

Valyuta.az xəbər verir ki, bu barədə hüquqşünas Aydan Rəhimli məlumat verib: “İlk olaraq siz kommunal xidmət göstərən quruma müraciət etməlisiniz. Burada əsassız yaranmış kommunal borcun hansı formada yaranması aydınlaşdırılmalıdır. Ola bilər ki, siz mənzilin yeni sahibisiniz və həmin borc köhnə sahiblə əlaqədar sizə yazılıb, yaxud da mənzil uzun müddət boş qalıb, lakin kommunal borc hesablanıb. Eləcə də ola bilər ki, texniki səhv nəticəsində kommunal borc artıq və əlavə olaraq hesablanıb.

Belə olduğu təqdirdə sizin təqdim etdiyiniz sübutlar, yəni ödəniş qəbzləri, mənzilin çıxarışı, müqavilə və.s bu sənədlər əsasında kommunal xidmət göstərən qurum sizin müraciətinizi araşdırır. Əgər 15 gün müddət keçsə və sizə müvafiq bir cavab verilməzsə, siz Antiinhisar və İstehlak Bazarına Nəzarət Dövlət Agentliyinə müraciət etməlisiniz.

Əgər müsbət bir nəticə hasil olmazsa, məhkəməyə müraciət edə bilərsiniz".

Sərvanə Rəmixanova