ABŞ-nin avtomobil idxalına rüsum tətbiq etməsi "Porsche" və "Mercedes-Benz" üçün ciddi maliyyə itkilərinə səbəb ola bilər.

Valyuta.az xəbər verir ki, tariflərin tətbiqi nəticəsində bu şirkətlər 3,4 milyard avro zərər görə bilər.

Həmçinin bu rüsumlar 2026-cı ildə "Porsche" və "Mercedes"in gözlənilən əməliyyat mənfəətinin təxminən dörddə birini azalda bilər. İstehsalçılar bu təsiri kompensasiya etmək üçün qiymətləri artırmalı və ya istehsalın bir hissəsini ABŞ-a köçürməli olacaqlar.

Bu qərarın elan edilməsindən sonra "Porsche" və "Mercedes"in səhmləri Frankfurt birjasında 5,7%, "BMW AG"nin səhmləri isə 4,9% dəyər itirib.

Donald Tramp 26 martda ABŞ-nin xaricdə istehsal olunan avtomobillər və onların ehtiyat hissələri üçün 25% gömrük rüsumu tətbiq edəcəyini açıqlayıb. Tariflər 3 apreldə qüvvəyə minəcək. Tramp bildirib ki, ABŞ, Kanada və Meksika arasında imzalanan USMCA sazişi çərçivəsində istehsal olunan avtomobillər üçün rüsumlar yalnız "Amerikada istehsal olunmayan hissələrə" tətbiq ediləcək.

ABŞ prezidenti bu addımı milli təhlükəsizliyi qorumaq və daxili avtomobil sənayesini gücləndirmək məqsədilə atdığını bildirib.

Trampın açıqlamasından sonra dünya birjalarında indekslər aşağı düşüb. Yaponiyanın "Nikkei" indeksi 1%, Cənubi Koreyanın "KOSPI" indeksi isə 1,3% dəyər itirib. "Toyota Motor"un səhmləri Nasdaq birjasında premarketdə 2%-dən çox, "Mazda Motor"un səhmləri isə 1,5% ucuzlaşıb. "Tesla"nın səhmləri 26 martda əsas ticarət sessiyasında 5,6% düşsə də, premarketdə 0,93% artıb. "General Motors"un səhmləri 6,18%, "Ford"un səhmləri isə 4,7% dəyər itirib.

2024-cü ildə ABŞ avtomobil idxalına 474 milyard dollar xərcləyib, bunun 220 milyard dolları yüngül avtomobillərə aiddir. Ən iri avtomobil tədarükçüləri Meksika, Yaponiya, Cənubi Koreya, Kanada və Almaniya olub.

Avropa Komissiyasının rəhbəri Ursula fon der Lyayen ABŞ-nin qərarını tənqid edərək bildirib ki, Aİ iqtisadi maraqlarını qorumaq üçün danışıqlar aparacaq. O, tarifləri "biznes üçün pis, istehlakçılar üçün isə daha da pis" adlandırıb. Kanadanın baş naziri Mark Karni isə bu addımı "Kanada işçilərinə birbaşa hücum" kimi qiymətləndirib və cavab tədbirlərinin nəzərdən keçirildiyini bildirib.