“Microsoft”un qurucusu Bill Qeyts süni intellektin bir çox sahədə insan əməyini əvəzləyəcəyini desə də, bəzi peşələrin hələ uzun müddət əhəmiyyətini qoruyacağını bildirib. 

Valyuta.az xəbər verir ki, onun fikrincə, proqram mühəndisləri, bioloqlar və enerji mütəxəssisləri bu dəyişiklikdən daha az təsirlənəcək.

Qeytsə görə, proqram mühəndisliyi sahəsində süni intellekt yalnız dəstəkçi rol oynaya bilər. Kodların təhlili, alqoritmlərin qurulması və sistemlərin təkmilləşdirilməsi hələ də insan nəzarətinə ehtiyac duyur.

Biologiya sahəsində, süni intellekt diaqnostika və məlumat analizi kimi texniki işlərdə faydalı ola bilər. Lakin elmi tədqiqatlar, yeni kəşflər və dərmanların hazırlanması kimi sahələrdə insan yaradıcılığı və təcrübəsi əvəzolunmaz olaraq qalır. Qeyts qeyd edir ki, canlı orqanizmlərin kompleks quruluşu və bioloji proseslərin çoxşaxəliliyi süni intellektin tam mənimsəyə bilməyəcəyi sahələrdəndir.

Enerji sektoru isə çoxsaylı dəyişkənlər və mürəkkəb infrastrukturla xarakterizə olunur. Yeni enerji mənbələrinin inkişafı, enerji şəbəkələrinin idarə olunması və davamlılıq hədəfləri üzrə qərarların verilməsi hələ də insan düşüncəsi və strateji baxış tələb edir. Qeytsin fikrincə, enerji sahəsində süni intellekt texniki dəstək versə də, bu sahənin tam avtomatlaşdırılması yaxın gələcəkdə mümkün deyil.

Sonda Qeyts vurğulayıb ki, süni intellekt bir çox sahədə iş dünyasını dəyişsə də, bəzi peşələrdə insan faktoru uzun müddət vacib olaraq qalacaq.

Sərvanə Rəmixanova