Azərbaycanda qızıl, gümüş və mis hasilatı ilə məşğul olan Böyük Britaniya şirkəti “Anglo Asian Mining Plc.” (AAM) “Gilar” yatağında ilk filizin hasilatına başlayıb.

Bu barədə şirkət məlumat yayıb.

Bildirilib ki, yatağın ehtiyatları 255 min unsiya qızıldan çox qiymətləndirilir.

“Anglo Asian Mining” yaxın bir neçə ay ərzində istehsalın sabit artımını gözləyir ki, aylıq təxminən 50-60 min ton filiz hasilatı hədəfinə çatsın.

"54 min tondan çox mis və 255 min unsiya qızıl təsdiqlənmiş ehtiyatları ilə, “Gilar” orta səviyyəli istehsalçı olmaq strategiyamızda həlledici rol oynayacaq", - şirkətin baş direktoru Reza Vəziri bildirib.

“Gilar” Gədəbəy müqavilə sahəsində faydalı qazıntı yatağıdır və şirkətin emal müəssisələrindən təxminən 7 km məsafədə yerləşir.

Hazırda “Anglo Asian Mining” şirkəti 2 yataqda hasilat aparır. “Gədəbəy” yatağında ilk qızıl hasilatı 2009-cu ildə, gümüş hasilatı isə 2010-cu ildə başlanıb. “Qoşa” yatağı 2013-cü ilin sentyabrından işlənilir. 

1997-ci il avqustun 21-də imzalanan Production Sharing Agreement (PSA) tipli müqavilə çərçivəsində 6 yatağın işlənməsi nəzərdə tutulurdu. Müqaviləyə əsasən, Azərbaycanın payı 51 %, “Anglo Asian Mining PLC” şirkətinin payı isə 49 % təşkil edir. Hazırda şirkət Azərbaycanda 8 müqavilə sahəsində fəaliyyət göstərmək hüququna malikdir.

©Report