İtaliyanın mərkəzində yerləşən, Adriatik sahili ilə Gran Sasso dağ silsiləsi arasında yerləşən Abruzzo bölgəsinin Penne qəsəbəsi 1 avroya (1,85 AZN) təklif edilən evlərlə gündəmə gəlib.

Əhalinin azalması və binaların tərk edilməsinin qarşısını almaq məqsədilə Penne bələdiyyəsi xarabalığa çevrilmiş evləri çox ucuz qiymətə satışa çıxarıb. Evləri almaq istəyən şəxslərdən 3 il ərzində evin təmirini həyata keçirmək öhdəliyi tələb olunur. Bundan əlavə, alıcılardan 2 min ilə 5 min avro (təxminən 3,700-9,250 AZN) arasında depozit ödənməsi istənilir. Təmir işləri başa çatdıqdan sonra bu məbləğ geri qaytarılır.

Penne Bələdiyyə Başçısı Petrucci bildirib ki, alıcılara təmir prosesi boyunca dəstək göstərə biləcək memar, mühəndis və ekspertlərdən ibarət bir heyət yaradılıb. Bu mütəxəssislər alıcılara evin təmir sonrası görünüşünü vizual şəkildə təqdim edir və işlər zamanı peşəkar məsləhətlər verirlər.

Petruccinin sözlərinə görə, orta ölçülü bir evin ilkin təmir xərci təxminən 20 min avrodur(təxminən 37 min AZN). Bu layihə, həm regiona yeni nəfəs gətirmək, həm də köhnə evləri canlandırmaq məqsədi daşıyır.