İlk qatlana bilən "iPhone"un qiymətinin 2300 dollar olacağı gözlənilir. 

Valyuta.az xəbər verir ki, Britaniyanın "Barclays" bankının analitiki Tim Lonqun araşdırmasına görə, bu model bazardakı digər qatlanan smartfonlardan daha bahalı olacaq və "Apple" tarixində ən yüksək qiymətə sahib telefon kimi təqdim ediləcək.

Lonqun proqnozuna əsasən, ilk qatlanan "iPhone" 2026-cı ilin sonu - 2027-ci ilin əvvəllərində satışa çıxacaq və onun qiyməti təxminən 2300 dollar olacaq. Bu isə "iPhone 16 Pro Max" modelindən iki dəfə bahadır, çünki onun əsas versiyasının qiyməti 1200 dollardan başlayır.

"Barclays" analitiki bu qiymətləndirməni Asiyaya son səfəri zamanı, istehsalçılarla görüşdükdən sonra təqdim edib. Onun sözlərinə görə, yüksək qiymət satış həcmini məhdudlaşdıra bilər, lakin "Apple" ekranda görünən qat izi olmadan innovativ dizayn təklif edə bilsə, bu modelə sabit tələbat yarana bilər.

Daha əvvəl digər analitik Min-Çi Kuo da qatlanan "iPhone"un qiymətini 2000-2500 dollar aralığında dəyərləndirmişdi. Gözləntilərə əsasən, bu model "Samsung Z Fold" kimi olacaq və 5,5 düymlük xarici, 7,8 düymlük daxili ekrana sahib olacaq. Bundan əlavə, "Apple"ın bu modeldə "Face ID" funksiyasından imtina edərək "Touch ID"yə keçəcəyi bildirilir.

Hazırda "Apple" mövcud smartfon formatından tam razıdır və qatlanan "iPhone"un "iPhone 17" və ya "iPhone 18" modelindən əvvəl təqdim ediləcəyi gözlənilmir.

Hazırda "Apple" bazarda qatlanan cihaz təklif etməyən yeganə texnologiya nəhənglərindən biridir. Bu arada "Samsung" yeddinci nəsil "Galaxy Z" modellərini təqdim etməyə hazırlaşır, "Huawei" isə daha da irəli gedərək dünyanın ilk üç dəfə qatlanan smartfonunu satışa çıxarıb.

Yeni "iPhone 17" modelləri barədə artıq bir sıra detallar məlumdur. Gözlənilir ki, bu seriyadakı bütün cihazlar təkmilləşdirilmiş 24 MP ön kamera və 120 Hz-lik ekranlarla təchiz olunacaq. Həmçinin, "Apple" gələcək modellərin dizaynında ciddi dəyişikliklər etməyi planlaşdırır.

Paşa Məmmədli