"Hyundai Motor Türkiye"nin baş direktoru Murat Berkel, şirkətin 2024-cü il fəaliyyətinin və 2025-ci il gözləntilərinin müzakirə edildiyi toplantıda Türkiyədə elektrikli avtomobil istehsalına 2025-ci ilin ikinci yarısında İzmit zavodunda başlanacağını açıqlayıb. 

Valyuta.Az-ın "Bloomberg"ə istinadən verdiyi xəbərə əsasən, o bildirib ki, bu modelin istehsalı ilə yanaşı, benzinlə işləyən modellərin istehsalı da eyni vaxtda davam edəcək.  

Zavodda elektrikli avtomobil istehsalı ilə bağlı işlərin sürətlə davam etdiyini vurğulayan Berkel deyib: "Elektrifikasiya sahəsində də Türkiyədə iz qoymaq istəyirik. Bu baxımdan xüsusilə Türkiyədəki istehsal keyfiyyəti ən yüksək səviyyədədir. Markamız 5 ulduzlu bir zavoda sahibdir. Burada yüksək keyfiyyətli elektrikli avtomobil istehsal ediləcək və həm Türkiyə bazarına, həm də Avropaya təqdim olunacaq. Bu, Türkiyə avtomobil sənayesi üçün çox vacib bir hadisədir. 'Togg'dan sonra Türkiyədə elektrikli avtomobil istehsal edən ikinci marka olacağıq. Hətta xarici mənşəli markalar arasında birinci yeri tutacağıq. Bu da markamızın Türkiyəyə, yerli istehsalçılara və işçilərə verdiyi əhəmiyyəti göstərir."

Berkel ötən il qlobal avtomobil satışlarının əvvəlki illə müqayisədə 1,7% artaraq 88,2 milyona çatdığını qeyd edib.  

Dünyada elektrikli avtomobil satışlarının 17 milyonu keçməsinin diqqətçəkən bir məqam olduğunu bildirən Berkel əlavə edib: "Beş il əvvəl elektrikli avtomobil satışları 2 milyon civarında idi. Son illərdə ciddi artım müşahidə olunub. Hazırda dünyada 500 tam elektrikli model satışdadır. 2030-cu ilə qədər bu rəqəmin 1000-ə çatacağı proqnozlaşdırılır."

Gələcək dövrdə yeni model haqqında daha ətraflı məlumat paylaşacaqlarını vurğulayan Berkel deyib: "Digər modellərimizin istehsalı davam edəcək. Bu avtomobilimiz tam elektrikli olacaq, lakin hansı seqmentə aid olacağını hələlik açıqlaya bilmirik."

O, bu istehsal genişlənməsinin markanın Avropa avtomobil bazarındakı mövqeyini gücləndirəcəyini və eyni zamanda Türkiyənin istehsal sektoruna töhfə verəcəyini qeyd edib.  

Berkel bildirib ki, 28 il ərzində 3 milyondan çox avtomobil istehsal edən "Hyundai Motor Türkiye" məşğulluğa, ixraca və milli iqtisadiyyata əhəmiyyətli dərəcədə töhfə verməyə davam edəcək.  

Sonda o əlavə edib ki, istehsal ediləcək elektrikli avtomobilin detalları ilə bağlı hələlik yekun qərar verilməyib, lakin qərar qəbul edildikdən sonra bütün məlumatlar ictimaiyyətlə paylaşılacaq.  

Rəhim