Tarixdə ilk dəfə keçiriləcək kriptovalyuta sammiti ABŞ-də təşkil olunacaq. 

Valyuta.Az xəbər verir ki, 7 martda keçiriləcək sammitdə sektorun aparıcı nümayəndələri bir araya gələcək. Mütəxəssislərin fikrincə, prezident Donald Trampın iştirakı ilə baş tutacaq bu tədbir ABŞ hökumətinin yeni kriptovalyuta siyasətini formalaşdıra bilər.

Sammitə Ağ Evin süni intellekt və kriptovalyuta üzrə rəsmisi Devid Saks rəhbərlik edəcək, təşkilati işləri isə işçi qrupunun rəhbəri Bo Hines idarə edəcək.  

Ağ Evdəki kriptovalyuta sammiti nə vəd edir?

Məlum olduğu kimi, Tramp administrasiyası kriptovalyuta sektorunu dəstəkləyən siyasətlə gücləndirməyi hədəfləyir. Əvvəlki hökumət dövründə tətbiq olunan məhdudiyyətlər bir çox investorun və şirkətin fəaliyyətinə mane olmuşdu. Tarixin ilk dəfə kriptovalyuta sammitinə ev sahibliyi edəcək Ağ Ev, əldə edəcəyi məlumatlarla kriptovalyuta ekosistemi üçün daha şəffaf və proqnozlaşdırıla bilən hüquqi çərçivə yaratmağa bir addım daha yaxınlaşmağı planlaşdırır.  

Hökumət innovasiyanı təşviq edən yanaşma qəbul etmək istəyir. Trampın rəhbərliyi altında ABŞ kriptovalyuta bazarına daha müsbət və dəstəkləyici baxış bucağı ilə yanaşır. Sammitin əsas məqsədi investorların və şirkətlərin gələcəyə daha inamlı baxmasını təmin etməkdir.  

Tramp prezidentliyə namizəd olduğu dövrdə özünü “Amerikanın ilk kriptovalyuta dostu prezidenti” kimi təqdim etmişdi. Prezident kürsüsünə əyləşdikdən cəmi bir həftə sonra imzaladığı 14178 saylı sərəncamla kriptovalyuta sektorunu dəstəkləyəcəyini bir daha bəyan etmişdi. Hökumətin əsas siyasəti iqtisadiyyatın bütün sahələrində kriptovalyutaların məsuliyyətli inkişafını təşviq etməkdən ibarətdir.  

Bundan əlavə, Trampın seçki kampaniyasında maliyyə azadlığını artırmaq əsas vurğulardan biri olmuşdu. Yeni dövrdə kriptovalyutaların ABŞ-nin maliyyə strategiyasında mərkəzi rol oynayacağı gözlənilir. Bu baxımdan, Ağ Evin tarixin ilk kriptovalyuta sammitinə ev sahibliyi etməsi bazar üçün olduqca əhəmiyyətli hadisə kimi qiymətləndirilir.  

Rəhim