"Tesla" səhmləri satışların zəifləməsi və İlon Maskın siyasi addımlarının bazara təsiri səbəbindən dekabr ayında tarixi zirvəyə çatdıqdan sonra 40% ucuzlaşıb.

Valyuta.az xəbər verir ki, "Tesla"nın baş icraçı direktoru və DOGE adlı dövlət qurumunun rəhbəri olan Mask dövlət qulluqçularından həftə ərzində gördükləri işlər barədə hesabat vermələrini istəyir. "Tesla" investorları isə eyni sualı Maskın özünə ünvanlamaq niyyətindədirlər.

"Tesla" səhmləri 30% geriləyib

Bu il ərzində "Tesla" səhmləri 30,2% dəyər itirib və ABŞ prezidenti Donald Trampın 5 noyabr seçkilərində qələbə qazanmasından sonra əldə edilən bütün qazancı silib. 

17 dekabrda səhmlər 479,86 dollarla tarixi maksimuma çatdıqdan sonra tədricən ucuzlaşaraq şirkətin bazar dəyərinin 1 trilyon dollar həddindən aşağı düşməsinə səbəb olub.

Cümə axşamı "Tesla" səhmləri daha 3% enişlə bağlanıb.

Siyasət uğur gətirmədi

"Tesla" səhmləri Trampın seçilməsindən sonra yüksəlişə keçmiş, Maskın isə Ağ Evə yaxınlığı ona DOGE təşəbbüsünü yaratmağa və bu qurumun formal rəhbəri olmağa imkan vermişdi. Lakin Maskın rəhbərliyinin "Tesla"nı daha da gücləndirəcəyinə dair gözləntilər özünü doğrultmayıb və səhmlər kəskin şəkildə ucuzlaşıb.

"Tesla"nın dördüncü rüb maliyyə hesabatları və satış göstəriciləri zəif olub, şirkətin illik avtomobil tədarükləri ilk dəfə azalıb. Yanvarın əvvəlində "Tesla"nın avtonom idarəetmə funksiyası ABŞ Milli Avtomobil Yolları Təhlükəsizliyi Administrasiyası (NHTSA) tərəfindən araşdırılmağa başlanıb. 

Bundan əlavə, "Cybertruck" modelinə tələbatla bağlı narahatlıqlar yaranıb və yanvar ayında "Tesla"nın Avropada satışlarının düşdüyü müşahidə edilib.

Maskın siyasi fəaliyyəti narahatlıq yaradır

Analitiklərə görə, səhmlərin kəskin enməsində əsas amillərdən biri Maskın siyasətlə həddindən artıq məşğul olmasıdır. Onun həm ABŞ-da DOGE ilə bağlı mübahisəli addımları, həm də beynəlxalq arenada ifrat sağçı siyasi mövqeləri açıq şəkildə dəstəkləməsi ictimaiyyətdə və potensial "Tesla" alıcıları arasında narazılığa səbəb olur.

Bununla yanaşı, Maskın siyasətə yönəlməsi investorların onun şirkətə kifayət qədər diqqət ayırmadığını düşünməsinə yol açır.

"Tesla" səhmləri əvvəllər də volatilliyi ilə seçilib. Qısa müddətdə 20-30%-lik geriləmələr qeyri-adi hal deyil. Xüsusilə ilin birinci və üçüncü rüblərində şirkətin səhmləri adətən zəif performans göstərir.

Bununla belə, Trampın seçkidə qalib gəlməsindən sonra böyük yüksəliş yaşayan "Tesla" səhmləri hazırda ciddi bir təzyiq altındadır.

Gələcək üçün ümidlər qalır

Bütün bu mənfi tendensiyalara baxmayaraq, "Tesla" investorları üçün hələ də ümidverici məqamlar mövcuddur. Şirkət ən çox satılan "Model Y" modelinin yenilənmiş versiyasını bazara çıxarıb, ilin ilk yarısında daha ucuz bir elektrik avtomobili təqdim edəcəyi gözlənilir. Bundan əlavə, iyun ayında Texasın Ostin şəhərində pullu, nəzarətsiz robot taksi sınaqlarına başlanması planlaşdırılır.

Paşa Məmmədli