Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyi elan etdiyi 4 tender ləğv edilib.

Valyuta.Az xəbər verir ki, ləğv edilən tenderlərin toplam dəyəri 17 mln. manatdan çox olub.

Məlumata əsasən, tenderlər, əlilliyi müəyyən edilmiş şəxslər və şəhid ailələri üçün Salyan rayonunda 56 ədəd üçotaqlı, Neftçala rayonunda 40 ədəd üçotaqlı, Saatlıda 54 ədəd ikiotaqlı, 36 ədəd üçotaqlı mənzilin satın alınması ilə bağlı olub.

Ayrı-ayrılıqda tenderlər və onların qiymətləri isə aşağıdakı kimi olub:

I. Əlilliyi müəyyən edilmiş şəxslərə və şəhid ailələrinə Salyan rayonunda 12 ədəd üçotaqlı mənzilin satın alınması - 1.231.200,00 AZN

II. Əlilliyi müəyyən edilmiş şəxslərə və şəhid ailələrinə Saatlı rayonunda 27 ədəd ikiotaqlı, 18 ədəd üçotaqlı mənzilin satın alınması - 3.924.450,00 AZN

III. Əlilliyi müəyyən edilmiş şəxslərə və şəhid ailələrinə Neftçala rayonunda 20 ədəd üçotaqlı mənzilin satın alınması - 2.052.000,00 AZN

IV. Əlilliyi müəyyən edilmiş şəxslərə və şəhid ailələrinə Neftçalada 20 ədəd üçotaqlı, Saatlıda 27 ədəd ikiotaqlı, 18 ədəd üçotaqlı, Salyanda 44 ədəd üçotaqlı mənzilin satın alınması - 10.490.850,00 AZN

Xatırladaq ki, Sosial Xidmətlər Agentliyinin bu ay daha bir tenderi ləğv edilib. 19 fevral 2025 Əlilliyi müəyyən edilmiş şəxslərə və şəhid ailələrinə Zərdab rayonunda 18 ədəd ikiotaqlı, 12 ədəd üçotaqlı mənzilin satın alınması ilə bağlı elan edilən və 2.368.800,00 AZN dəyərində olan tender də ləğv edilmişdi. 

Hər 5 tender eyni səbəbdən - “Dövlət satınalmaları haqqında” qanunun 36.1.1 (satınalmada iştirak etmək üçün təklifi və təklifin təminatını təqdim etmiş, tələb olunduğu halda müvafiq lisenziyaya və ya icazəyə malik olan təchizatçıların sayı üçdən az olması) bəndinə uyğun olaraq - ləğv edilib. 

Rəhim