2024-cü ilin son rübündə "Ziraat Bank Azərbaycan”ın vaxtı keçmiş kreditləri artmaqda davam edib.

Valyuta.az xəbər verir ki, bankın vaxtı keçmiş kreditləri ötən ilin III rübünə nisbətən ilin sonunda 2 dəfə və ya 19,1 milyon manat artaraq 38,6 milyon manata yüksəlib. Ötən ilin III rübündə bu rəqəm 18,5 milyon manata bərabər olub.

Bu isə bankın vaxtı keçmiş kreditlərinin ümumi portfeldə çəkisinin 4,4 %-dən 7,3 %-ə kimi artmasına təsir edib.

"Ziraat Bank Azərbaycan”ın vaxtı keçmiş kreditlərində ən böyük artım biznes kreditləri üzrə müşahidə edilir. Bankın vaxtı keçmiş biznes kreditləri 18,5 milyon manat artaraq 19,1 milyon manatdan 37,66 milyon manata kimi yüksəlib.

Bu dövrdə bankın vaxtı keçmiş kreditlərinin cəmi 983,4 min manatı istehlak kreditlərinə aid olub. Bu isə əvvəlki rüblə müqayisədə 2,6 dəfə çoxdur. 2024-cü ilin III rübündə bu rəqəm cəmi 376,2 min manat təşkil edib.

Xatırladaq ki, "Ziraat Bank Azərbaycan” 2014-cü ildə yaradılıb, onun nizamnamə kapitalı 65,5 milyon manatdır. Bankın səhmlərinin 99,98 %-i "Ziraat Bank”a (Türkiyə), 0,01 % - "Ziraat Texnoloji Şirkəti”nə, 0,01 %-i isə Ziraat Yatırım Menkul Değerler Şirkətinə (Türkiyə) məxsusdur.