"Stellantis "2024-cü ildə Şimali Amerikadakı çətinliklər səbəbindən mənfəətinin 70% azaldığını açıqlayıb. 

Valyuta.az xəbər verir ki, "Fiat", "Chrysler", "Jeep" və "Peugeot" kimi markaları özündə birləşdirən avtomobil konserni, cirosunun 17% azalaraq 156,9 milyard avroya (164,6 milyard dollar) düşdüyünü bildirib.

Şirkətin mənfəəti 2023-cü ildə 18,6 milyard avro təşkil edirdisə, 2024-cü ildə bu rəqəm 5,5 milyard avroya qədər azalıb.

AFP agentliyinin məlumatına görə, "Stellantis"in keçmiş baş icraçı direktoru Karlos Tavares şirkət daxilində mənfəət azalması ilə bağlı fikir ayrılıqları səbəbilə dekabr ayında istefa verib.

"Stellantis"in açıqlamasında bildirilir ki, yeni baş icraçı direktor axtarışı davam edir və 2025-ci ilin ilk yarısına qədər yeni rəhbərin seçilməsi gözlənilir. Bu müddətdə müvəqqəti idarəetmə komandası şirkətin performansını və gəlirliliyini yaxşılaşdırmaq üçün sürətli və qəti addımlar atıb.

"Stellantis" əsas bazarı olan Şimali Amerikada ciddi problemlərlə üzləşib. Şirkət elektrikli avtomobillərlə bağlı çətinliklər və zəif satışlar səbəbindən yeni modellərin təqdimatını gecikdirməli olub.

İtaliya, ABŞ və Fransa mənşəli avtomobil nəhənginin 14 markası arasında "Fiat", "Peugeot-Citroën", "Opel", "Maserati", "Chrysler", "Ram" və "Jeep" yer alır. Şirkət gələcəkdə bu problemləri aradan qaldırmaq üçün yeni strategiyalar üzərində işləyir.

Paşa Məmmədli