Yapon avtomobil sənayesinin Meksikadakı 18 milyard dollarlıq sərmayəsi ABŞ prezidenti Donald Trampın gömrük tarifləri tətbiq edəcəyi təhdidi səbəbindən risk altına düşə bilər.

Valyuta.az xəbər verir ki, "Financial Times"ın məlumatına görə, Tramp administrasiyasının Meksika və Kanadadan ABŞ-a idxal edilən avtomobillərə və avtomobil hissələrinə gömrük vergisi tətbiq etmək niyyəti, Yapon avtomobil istehsalçılarının Meksikadakı iri sərmayələrinin gələcəyini sual altına salır.

Yapon avtomobil istehsalçıları Meksikada həm tam avtomobil montajı, həm də avtomobil hissələri istehsalı üçün 18 milyard dollarlıq sərmayə qoyublar. Hazırda dörd böyük yapon avtomobil şirkəti Meksikada illik 1,3 milyon avtomobil istehsal edir. Bu, digər bütün ölkələrdəki avtomobil istehsalçılarından daha yüksək göstəricidir.

Əgər gömrük tarifləri tətbiq olunarsa, bu yalnız tam yığılmış avtomobilləri deyil, Meksika və Kanadadan ABŞ-a hər gün daşınan 110 min təkər və digər avtomobil hissələrini də əhatə edəcək.

"Nissan"ın baş icraçı direktoru Makoto Uçida şirkətin yüksək gömrük tariflərinə qarşı hazırlıqlı olması lazım olduğunu vurğulayıb.

"Bəlkə də Meksikada istehsal etdiyimiz bəzi modelləri başqa bir ölkəyə köçürə bilərik", deyə Uçida bildirib.

2014-cü ildə Meksikanın Quanaxuato əyalətində istehsala başlayan yapon avtomobil hissələri tədarükçüsü "Plasess" şirkətinin rəhbəri Naohisa Komura, yeni sərmayə qərarlarının qeyri-müəyyənlik səbəbindən dondurulduğunu açıqlayıb:

"Trampın açıqlamaları davamlı olaraq dəyişir, bu da vəziyyəti son dərəcə mürəkkəbləşdirir. Qəti məlumat olmadan heç bir iş qərarı verə bilmərik".

ABŞ-ın potensial gömrük tarifləri Yapon avtomobil istehsalçılarının Meksikadakı istehsal və tədarük zənciri strategiyalarını yenidən nəzərdən keçirməsinə səbəb ola bilər. "Nissan" və digər şirkətlər mümkün ssenariləri qiymətləndirir, lakin təhlükə gerçəkdir və bu böyük sərmayənin gələcəyi hələ ki qeyri-müəyyəndir.

Paşa Məmmədli