"Nvidia"nın 4-cü rüb maliyyə hesabatı bu gün açıqlanacaq və şirkətin gömrük tarifləri və ixrac məhdudiyyətləri ilə bağlı təzyiqləri necə idarə etdiyi diqqət mərkəzində olacaq.

Valyuta.az xəbər verir ki, süni intellekt çipləri sahəsində lider olan "Nvidia" bazardakı dominant mövqeyini qorumağa davam edir. Şirkətin qrafik prosessorları (GPU) təkcə Silikon Vadisində deyil, bütün dünyada böyük tələbat görür. "Amazon", "Google", "Meta" və "Microsoft" kimi texnologiya nəhəngləri süni intellekt mərkəzləri üçün milyardlarla dollar sərmayə qoyur və bu vəsaitlərin bir hissəsi birbaşa "Nvidia"ya yönəlir.

Bununla belə, "Nvidia" bəzi çətinliklərlə də üzləşir. Məsələn, texnologiya şirkətləri öz çip istehsal proseslərini inkişaf etdirərək "Nvidia"ya rəqib olmağa başlayır. Eyni zamanda, "DeepSeek" kimi daha effektiv süni intellekt modellərinin inkişafı investorları düşündürür. Bu modellərin yayılması, müştəriləri gələcəkdə daha ucuz alternativlərə yönəldə bilər.

"Wall Street" analitiklərinin "Bloomberg" vasitəsilə təqdim etdiyi konsensus proqnozlarına görə, "Nvidia"nın bu rüb üçün 38,2 milyard dollar gəlir əldə edəcəyi və hər səhm üçün 0,84 dollar mənfəət açıqlayacağı gözlənilir.

Bu rəqəmlər ötən ilin eyni dövrü ilə müqayisədə mənfəətdə 63%, gəlirdə isə 73% artım deməkdir. Lakin investorlar bunu yetərli hesab etməyə bilər. Çünki ötən ilin 4-cü rübündə şirkətin mənfəəti 486%, gəliri isə 265% artmışdı. Yəni bu dəfəki artım əvvəlki qədər böyük olmayacaq və bazarda məyusluq yarada bilər.

"Nvidia"nın əsas gəlir mənbəyi süni intellekt və məlumat mərkəzləri olacaq. Bu seqmentin gəlirinin 34 milyard dollara çatacağı gözlənilir. Oyun sektoru isə təxminən 3 milyard dollar gəlir gətirəcək. Qalan gəlirlər peşəkar qrafika, avtomobil texnologiyaları və OEM (orijinal avadanlıq istehsalçıları) seqmentlərindən gələcək.

İlin əvvəlindən etibarən "Nvidia" səhmləri 5%-dən çox dəyər itirib. "Google"ın ana şirkəti "Alphabet" 7%, "Amazon" 3%, "Microsoft" 5,5%, "Apple" isə 1% ucuzlaşıb. Böyük texnologiya şirkətləri üçün çətinliklər davam etsə də, "Meta" səhmləri 10%-dən çox artaraq bu tendensiyadan fərqli mövqe sərgiləyib.

Bu rüb hesabatı, "Nvidia"nın Çində "DeepSeek"in süni intellekt bazarına daxil olmasının yaratdığı təlatümdən sonra açıqladığı ilk hesabat olacaq. Yanvar ayının sonunda "DeepSeek"in inkişaf etdirdiyi süni intellekt modeli "Nvidia"nın ən güclü çiplərindən istifadə edirdi. Bu xəbər "Nvidia"nın bazar dəyərindən 600 milyard dolların silinməsinə səbəb olmuşdu. İnvestorlar, "DeepSeek"in yüksək performanslı modellərinin "Nvidia"nın çip bazarında üstünlüyünü azalda biləcəyindən ehtiyat edirdilər.

Buna baxmayaraq, "Nvidia"nın baş icraçı direktoru Censen Xuann bu iddialara qarşı çıxaraq bildirib ki, "DeepSeek"in süni intellekt modelləri, əslində, yüksək performanslı çiplərə olan tələbi artırır. Yəni bu texnologiyaların inkişafı "Nvidia" üçün təhlükə deyil, əksinə daha çox premium çip satışına stimul yarada bilər.

Paşa Məmmədli