"Toyota" idarə heyətini müstəqil direktorlarla yenidən "canlandırmaq" istəyir. 

Valyuta.az xəbər verir ki, "Toyota" müstəqil direktorların sayını 10 üzvlük idarə heyətinin yarısına qədər artıracaq və dünyanın bir nömrəli avtomobil istehsalçısında idarəetməni gücləndirməyi hədəfləyən yeni bir nəzarət komitəsi strukturunu tətbiq edəcək.

"Toyota" çərşənbə günü verdiyi açıqlamada komitənin üçü müstəqil xarici direktor olmaqla dörd səs hüququ olan idarə heyəti üzvlərindən ibarət olacağını bildirib. Dəyişikliklər şirkətin iyun ayında keçiriləcək illik yığıncağında səhmdarların təsdiqindən asılı olaraq tətbiq ediləcək.

Yaponiya Korporativ Direktorlar Assosiasiyası tərəfindən hazırlanan bir hesabata görə, nəzarət və müşahidə komitəsinə malik Yapon şirkətlərinin sayı 10 il əvvəl yeni qaydaların qüvvəyə minməsindən bəri artır və avqust 2024-cü ilə qədər Tokio Birjasında işləyən yüksək səviyyəli şirkətlərin 44%-ə çatır.

"Toyota"nın ümumi idarəetmə və insan resursları üzrə prezidenti Takanori Azuma brifinqdə bildirib: "Bütün üzvlərin qərar qəbulu prosesində iştirak edə biləcəyi bir idarə heyəti yaratmaq istəyirik. Fərqli mənşəyə malik insanların fikirlərinə ehtiyacımız var".

"Toyota" idarə heyətindəki yer sayını azaldaraq və xarici direktorların sayını artıraraq idarəetməni yaxşılaşdırmağa çalışdığını bildirib. İdarə heyətindəki qadınların sayı da indiki bir əvəzinə iki olacaq.

"Bloomberg Intelligence" analitiki Tatsuo Yoşida qərarı belə şərh edir: "Güclü bir etika mədəniyyətinə malik olan "Toyota" uzun müddətdir ki, yalnız struktur səbəblərə görə yeni bir idarəetmə sisteminə keçməyinə ehtiyac olmadığını iddia edirdi. Lakin daha güclü korporativ idarəetməyə olan tələbatın artması nəzərə alınaraq, "Toyota" indi idarəetmə çərçivəsini təkmilləşdirmək ehtiyacını qəbul etdi".

Hazırda İdarə Heyətinin sədri Akio Toyoda, icraçı direktor Koji Sato, texnologiyalara cavabdeh direktor Hiroki Nakajima və maliyyə işləri üzrə direktor Yoişi Miyazakidir. Altı yeni üzv isə Şiqeaki Okamoto, Kumi Fujisava, Kristopher P. Reynolds, Corc Olkott, Masahiko Oşima və Hiromi Osada olacaq.

Hazırda "Toyota"da ayrıca nəzarət şurasının 6 üzvünə əlavə olaraq 10 direktoru var. Təsdiqləndiyi təqdirdə, yeni struktur 10 direktoru saxlayacaq və onlardan dördü idarə heyətinin bir hissəsi olacaq yeni nəzarət komitəsində çalışacaq.

Ümumi yer sayının azaldılmasının yalnız gücü artırıb-artırmayacağı sualına Azuma daha kiçik bir idarə heyətinin daha sürətli qərar qəbul etməyə imkan yaratdığını və bütün üzvlərin fikirlərini söyləməsi üçün daha çox fürsət yaratdığını bildirib.

Paşa Məmmədli