Təmiz enerji sahəsi genişləndikcə, onu təmin edən mineral və metalların tapılması daha vacib olur. Bu problemi süni intellekt həll edə bilər.

Valyuta.Az xəbər verir ki, bu barədə "CNBC" məlumat yayıb.

Elektrikli avtomobillər, günəş panelləri və hidrogen yanacaq elementlərinin hamısının ortaq cəhəti var: onlar qiymətli metallara ehtiyac duyurlar.  

Ənənəvi olaraq, bu metalların tapılması və yerin dərinliklərindən çıxarılması uzun və çətin proses olub. Lakin bir sıra şirkətlərin tətbiq etdiyi yeni texnologiyalar bu sahədə inqilabi dəyişikliklər vəd edir.  

"Kobold Metals", "VerAI" və "Earth AI" adlı startaplar bu metalların bazara mümkün qədər tez çatdırılması uğrunda yarışır. "Earth AI" süni intellektlə dəstəklənən mineral kəşfiyyatı proqram təminatını özünəməxsus qazma texnologiyası ilə birləşdirir. Şirkətin topladığı məlumatlar son 50 ili əhatə edir.  

"Biz süni intellektimizi keçmişdə yüzlərlə geoloqun uğur və uğursuzluqlarından öyrənməsi üçün hazırlayırıq ki, gələcəkdə metalları harada axtarmaq lazım olduğunu daha dəqiq proqnozlaşdırsın," – deyə "Earth AI"ın baş icraçı direktoru Roman Teslyuk bildirib.  

Sistem potensial metal yataqlarını aşkar etdikdə, "Earth AI" bunu təsdiqləmək üçün cəmi tennis topu ölçüsündə bir dəlik açaraq qazma işləri apara bilir. Teslyukun sözlərinə görə, bu üsul əvvəlki metodlarla müqayisədə xərcləri yarıya endirir və prosesi xeyli sürətləndirir. "Mining Data Online" portalına görə, fərdi illik mədən gəlirləri 50 milyon dollardan 3 milyard dollara qədər dəyişə bilər.  

"Biz 2 000 fut (təxminən 600 metr) dərinliyə qədər qazır və gün işığı görməmiş süxur nümunələri götürürük. Bu süxurlardakı metallar yüz milyonlarla elektrik avtomobili istehsal etməyə imkan verir," – Teslyuk bildirib. "Onlar enerji şəbəkəmizi tamamilə bərpa olunan mənbələrə keçirməyə kömək edə bilər. Bu süxurlar bizi karbohidrogenlərdən uzaqlaşdırmağa qadirdir."

"Earth AI" mövcud mədənlər ətrafında deyil, tamamilə yeni ərazilərdə kəşfiyyat aparır və bu məlumatları mədən şirkətlərinə satır.  

"Bu minerallar üçün bazar çox böyükdür," – deyə "Earth AI"a sərmayə qoyan "Tamarack Global"ın idarəedici partnyoru Ceymi Li bildirib. "Onların bu məsələyə yanaşma tərzi diqqətimizi çəkdi, çünki onların biznes modelində və süni intellekt texnologiyalarında ciddi üstünlüklər var."

Şirkətin digər investorları arasında "Y Combinator", "Cantos Ventures", "Scrum Ventures", "Alpaca", "Sparkwave Capital" və "Overmatch" yer alır. "Earth AI" bu günə qədər 38 milyon dollar investisiya cəlb edib.  

"Earth AI" təkbaşına və tərəfdaşlarla birlikdə metal yataqlarını daha sürətlə aşkarlamaq üçün çalışır. Şirkət bu yaxınlarda Avstraliyada süni intellektin köməyi ilə "Legacy Minerals" ilə birgə layihə çərçivəsində ölkənin ən böyük təsdiqlənmiş palladium yataqlarından birini kəşf edib.  

Rəhim