"Apple" və İndoneziya hökuməti "iPhone 16" smartfonlarının ölkədə satışına qoyulan qadağanın aradan qaldırılması şərtləri ilə bağlı razılığa gəlib. 

Valyuta.az xəbər verir ki, bu barədə "Bloomberg" məlumat yayıb.

Oktyabr ayında İndoneziya daxili bazar üçün nəzərdə tutulan smartfonlarda 35% yerli məzmun tələblərinə cavab vermədiyi üçün "iPhone 16"nın satışını qadağan edib.

Mənbənin sözlərinə görə, "Apple" smartfonlar və digər məhsullar üçün komponentlər istehsal edən zavodun yaradılmasına 1 milyard dollar sərmayə qoymağı planlaşdırır, həmçinin tədqiqat və inkişaf üçün yerli mütəxəssislər hazırlamağı öhdəsinə götürür. Eyni zamanda, "Bloomberg"in qeyd etdiyi kimi, "Apple" yaxın gələcəkdə İndoneziyada "iPhone" istehsalına başlamağı planlaşdırmır.

Qadağanın icrasına cavabdeh olan Sənaye Nazirliyi müqaviləni bu həftənin əvvəlində imzalamağı planlaşdırır. Qeyd olunur ki, İndoneziya hakimiyyəti "iPhone 16"nın ölkədə satışına ən qısa zamanda icazə vermək niyyətindədir.

Noyabr ayında "Apple" "iPhone 16" satışına qoyulan qadağanı aradan qaldırmaq üçün 10 milyon dollar investisiya təklif edib, lakin sonradan təklifi 1 milyard dollara çatdırıb.

Hər iki tərəf qadağanın aradan qaldırılması şərtləri ilə bağlı razılığa gəlsə də, ekspertlər İndoneziyanın əvvəllər olduğu kimi öz fikrini dəyişə biləcəyindən ehtiyat edirlər ki, bu da razılaşmanı pozar.

Paşa Məmmədli