"Microsoft" şirkəti "Windows" üçün pulsuz "Office" versiyasını buraxıb. Bu versiya istifadəçilərə "Microsoft 365" abunəliyi və ya lisenziya almaq lazım olmadan "Word", "Excel" və "PowerPoint"də sənədlər yaratmaq və redaktə etmək imkanı verir. Lakin bu "Office" versiyasının müxtəlif məhdudiyyətləri və inteqrasiya olunmuş reklamları var.

Valyuta.az xəbər verir ki, bu barədə "3DNews" məlumat yayıb.

Pulsuz versiya yalnız "Windows" əməliyyat sistemi ilə işləyən kompüterlərdə mövcuddur və "Microsoft" tərəfindən rəsmi elan olunmadan buraxılıb. "Office"də reklamın tətbiqi ideyası ilk dəfə 2009-cu ildə müzakirə olunub və yalnız indi həyata keçirilib.

Pulsuz "Office" versiyasında iş prosesi veb versiyalara bənzəyir, lakin bəzi fərqlər var. Xüsusilə, "Word", "Excel" və "PowerPoint" sənədləri ilə işləyərkən istifadəçilər iş sahəsinin sağ tərəfində reklam banneri görürlər. Bu banner pulsuz abunə olmadan silinə bilmir. Bundan əlavə, hər bir neçə saatdan bir 15 saniyəlik səssiz video reklamlar nümayiş olunur.

Başqa bir məhdudiyyət isə sənədlərin lokal şəkildə saxlanılmamasıdır. Bunun əvəzinə istifadəçilərə faylları saxlamaq üçün "OneDrive" tətbiqi və ya bulud xidmətinin veb versiyası təklif olunur. Burada pulsuz olaraq 5 GB yer mövcuddur.

"Office"in bir çox əlavə funksiyaları da pulsuz versiyada əlçatan deyil. İstifadəçilər plaginlər qura bilməz, su nişanları əlavə edə bilməz və ya məlumat təhlili alətlərindən istifadə edə bilməz. "Word"də səhifə formatlaşdırma imkanları məhdudlaşdırılıb, "WordArt" və cədvəllər əlçatan deyil. "Excel" və "PowerPoint"də də oxşar məhdudiyyətlər tətbiq olunub.

"Microsoft" yeni məhsulu geniş ictimaiyyətə təqdim etmədiyi üçün güman edilir ki, reklamlı pulsuz "Office" versiyası məhdud istifadəçi dairəsi ilə test mərhələsindədir.

Paşa Məmmədli