"Bitcoin" 90 000 dollar həddinin altına düşərək noyabr ayının ortalarından bəri ən aşağı səviyyəyə gerilədi. Donald Trampın  Ağ Evə seçilməsindən sonra başlayan yüksəliş dalğası onun ticarət tariflərinin təsiri və bir sıra sənaye problemləri fonunda tərs istiqamətdə hərəkət edir.  

Valyuta.Az xəbər verir ki, bu barədə Bloomberg-in dərc etdiyi məqalədə bəhs olunur.

"Bitcoin" çərşənbə axşamı, London vaxtı ilə saat 08:50-də 89 700 dollara qədər bərpa olunmazdan əvvəl 6,1% ucuzlaşaraq noyabrın 15-dən bəri ən aşağı səviyyəsini gördü. Digər kriptovalyutalar da kəskin gerilədi – "Ether", "XRP" və "Solana" ticarət sessiyası ərzində ciddi itkilərlə üzləşdi.  

Rəqəmsal aktivlərdəki son dalğalanma, noyabr ayının əvvəlində Trampın seçilməsindən sonra kriptovalyuta bazarlarında yaranan riskli aktivlərə yönəlmiş yüksəliş tendensiyasından kəskin şəkildə fərqlənir. Yanvar ayında Trampın vəzifəyə başlamasından bəri "Bitcoin" dəyərinin təxminən 20%-ni itirib. Onun həm müttəfiqlərinə, həm də geosiyasi rəqiblərinə qarşı sərt mövqeyi investorların inamını sarsıdır və yüksək inflyasiya ilə bağlı narahatlıqlar davam edir.  

Ticarət tarifləri və makroiqtisadi qeyri-müəyyənliklər  

""Bitcoin" qiymətlərindəki enişin əsas səbəblərindən biri son günlərdə əksər maliyyə bazarlarını təsir altına alan və Prezident Tramp tərəfindən elan edilən müxtəlif tariflərlə əlaqəli olan daha geniş makroiqtisadi qeyri-müəyyənlikdir", – deyə kriptovalyuta birjası "Independent Reserve"un baş direktoru Adrian Przelozny bildirib.  

Törəmə maliyyə bazarlarında son 24 saat ərzində 1,34 milyard dollardan çox həcmdə yüksəliş yönümlü kriptovalyuta mövqeləri likvidasiya edilib. Bu barədə "CoinGlass" platformasının məlumatlarında qeyd olunur.  

Memecoin qalmaqalı və nəhəng kiberhücum  

Sənaye daxilində baş verən bir sıra son hadisələr də investor əhval-ruhiyyəsinin pisləşməsinə səbəb olub. Bunlara kriptovalyuta birjası "Bybit"ə qarşı həyata keçirilən ən böyük kiberhücum və Argentinanın prezidenti Xavyer Milei (Javier Milei) ilə bağlı memecoin qalmaqalı daxildir. Bu amillər son həftələrdə kriptovalyutaların texnologiya səhmləri kimi digər riskli aktivlərdən daha pis performans göstərməsinin səbəblərindən biridir.  

Xüsusilə "Bybit"ə qarşı həyata keçirilən kiberhücum rəqəmsal aktiv platformalarının təhlükəsizliyi ilə bağlı qorxuları artırıb. Analitiklərin Şimali Koreya ilə əlaqələndirdiyi hakerlər ötən həftəki hücum zamanı təxminən 1,5 milyard dollar dəyərində "Ether" oğurlayıb və bu vəsaiti sürətlə yumağa başlayıblar. Bir neçə araşdırmaçı bu soyğunçuluğun Şimali Koreyanın kibercinayətkar qruplarının artan peşəkarlığını göstərdiyini bildirir.  

Tramp və həyat yoldaşı Melaniya (Melania Trump) tərəfindən andiçmə mərasimindən əvvəl buraxılan memecoin-lər də uğursuzluğa düçar olub və onun kriptovalyuta siyasətinə olan etimadı zəiflədib. "Trump token" buraxıldıqdan sonra sürətlə zirvəyə qalxsa da, "CoinGecko"nun məlumatına görə, indiyədək 80%-dən çox dəyər itirib.  

""Bybit"ə edilən kiberhücum və mübahisəli memecoin-lərin buraxılması kimi son hadisələr kriptovalyuta bazarı iştirakçıları üçün keçmişdə yaşanmış xoşagəlməz xatirələri geri qaytardı", – deyə kriptovalyuta törəmə bazarı üzrə likvidlik təminatçısı olan "Orbit Markets"in həmtəsisçisi Karolin Mauron bildirib.  

Aydın