Çindən yayılan xəbərlər "Volvo S60" sedan modelində saxta "Bowers & Wilkins" dinamiklərinin istifadə edildiyini üzə çıxarıb. 

Valyuta.az xəbər verir ki, "Volvo China" bu problemi qəbul edərək, müştərilərin maraqlarına ziyan vuran hərəkətlərə qarşı tədbir görəcəklərini bildirib.

Çindən yayılan məlumatda bir "Volvo S60" sahibi avtomobilindəki dinamiklərin "Bowers & Wilkins" əvəzinə "Bowers & VVilkins" olaraq markalandığını aşkar edib. Bu isə avtomobildə saxta və ya imitasiyalı aksesuarların quraşdırıldığını göstərir.

"Ars Technica" tərəfindən də yayımlanan bu iddia, yüksək təhlükəsizlik və keyfiyyət standartları ilə tanınan "Volvo" üçün ciddi etimad böhranı yaradıb. Saxta dinamiklərlə yanaşı, eyni avtomobilin kristal sürət qutusunun dəyişdirmə düyməsinin də orijinal olmadığı və arxa işıqlandırmaya malik olmadığı müəyyən edilib.

Müştəri bu vəziyyətlə bağlı şikayət etsə də, avtomobili aldığı dilerlik mərkəzi məsələyə biganə yanaşıb. Lakin bəzi digər hallarda, müştəri şikayətlərindən sonra saxta dinamiklərin orijinalları ilə əvəz edildiyi məlum olub.

"Volvo China" yaşanan problemə və müştərilərin narahatlığına görə üzr istəyərək istifadəçilərin maraqlarına ziyan vuran heç bir hərəkətə göz yummayacaqlarını bildiriblər. Şirkət məsələ ilə bağlı xüsusi araşdırma apardıqlarını vurğulayaraq əlavə edib: "Volvo Cars" orijinal aksesuarlar üçün ciddi izlənmə idarəetmə sistemi tətbiq edir. Hər bir orijinal aksesuar təhlükəsiz və rahat bir sürücülük təcrübəsi təmin edir".

İndi əsas sual budur: bu qalmaqal "Volvo" rəhbərliyinin bilgisi daxilindəmi baş verib, yoxsa istehsal zəncirində bəzi işçilər bahalı səs sistemlərini oğurlayıb avtomobillərə saxta məhsullar quraşdırıblar?

Cavab nə olursa olsun, "Volvo"nun Çin şirkəti tərəfindən satın alındıqdan sonra brendlə bağlı yaranan narahatlıqları gücləndirən bir hadisə yaşanıb. Narahatlıq yalnız səs sistemi və lüks kristal sürət qolu ilə məhdudlaşmır, həm də "Volvo"nun üstünlük verdiyi hava yastıqları, sürücülük təhlükəsizliyi və qəza qoruması kimi həyati vacib məsələləri də əhatə edir.

Paşa Məmmədli