"BP"nin baş icraçı direktoru 2030-cu ilə qədər bərpa olunan enerji istehsalını 20 dəfə artırmaq hədəfini ləğv edəcək və diqqəti yenidən fosil yanacaqlara yönəldəcək. Çərşənbə günü elan ediləcək strategiya dəyişikliyi investorların gəlirlərlə bağlı narahatlıqlarını aradan qaldırmağa hesablanıb. 

Valyuta.Az xəbər verir ki, bu barədə "Reuters"ə iki mənbə məlumat verib.  

Son illərdə "BP"nin səhmləri rəqiblərinə nisbətən daha zəif performans göstərib və şirkət artıq 2030-cu ilə qədər neft və qaz hasilatını azaltmaq hədəfindən imtina edib.

Çərşənbə günü "BP"nin Kapital Bazarları Günü tədbiri zamanı baş icraçı direktor Mörrey Akinloss investorları şirkətin 2019-2030-cu illər arasında bərpa olunan enerji istehsal gücünü 20 dəfə artıraraq 50 giqavata çatdırmaq hədəfindən imtina etdiyini açıqlayacaq. Məsələdən xəbərdar olan iki mənbənin verdiyi məlumata görə, bu plan daha əvvəl ictimaiyyətə açıqlanmamışdı.  

"BP" mövzu ilə bağlı şərh verməkdən imtina edib.  

Şirkətin maliyyə hesabatları göstərir ki, "BP" hazırda 8,2 giqavat bərpa olunan enerji istehsal gücünə malikdir. 2019-cu ildə isə şirkətin xalis külək enerjisi istehsalı 926 meqavat olub. Həmin il üçün ümumi bərpa olunan enerji gücü ilə bağlı konkret rəqəm təqdim olunmayıb.  

Mənbələrin sözlərinə görə, "BP" bu il əsas mənfəət (EBITDA) hədəfini 49 milyard dollar səviyyəsində müəyyən etmək əvəzinə, illik faiz nisbətində artım hədəfi müəyyən edəcək. Lakin mənbələr rəsmi səlahiyyətləri olmadığı üçün adlarının açıqlanmasını istəməyiblər.  

Şirkət analitiklərlə keçirdiyi görüşlərdə bəzi hədəflərdən imtina edə biləcəyini qeyd etsə də, bu barədə hələ rəsmi açıqlama verməyib. "BP" 2024-cü il üçün 40,9 milyard dollar həcmində müəyyən edilmiş EBITDA hədəfinə çata bilməyib.  

Mənbələrin bildirdiyinə görə, şirkət borc yükünü azaltmaq və gəlirləri artırmaq üçün bəzi aktivlərini satmaq və aşağı karbonlu investisiyaları azaltmaq planlarını da ictimaiyyətə açıqlayacaq.  

Kapital Bazarları Günü tədbiri əvvəlcə 11 fevralda Nyu-Yorkda keçirilməli idi, lakin Akinlossun tibbi prosedurdan keçməsi səbəbindən tədbir çərşənbə gününə və Londona təxirə salınıb.  

Sektor üzrə genişmiqyaslı dəyişikliklər

Enerji sektorunda karbon emissiyalarını azaltmaq və iqlim dəyişikliyi ilə mübarizə məqsədilə portfellərini dəyişən iri şirkətlər yenidən diqqəti neft və qaz sənayesinə yönəldiblər. Pandemiyadan sonra fosil yanacaq qiymətlərinin artması bu sektorda gəlirliliyi artırıb.  

İnvestor mühiti də dəyişib. ABŞ Prezidenti Donald Trampın yenidən seçilməsi ilə yanaşı, iqlim dəyişikliyinə skeptik yanaşması və fosil yanacaqlara verdiyi dəstək şirkətlərin qərarlarına təsir edib.  

"BP" üzərində təzyiqlər artıb, xüsusilə də aktivist investor "Elliott Investment Management" şirkətin təxminən 5%-lik payını əldə etdikdən sonra.  

"Elliott", "Honeywell" və "Southwest Airlines" kimi şirkətlərdə dəyişikliyə təkan verməsi ilə tanınır və "BP"də xərclərin daha sərt nəzarətə alınmasını tələb edir.  

Məsələdən xəbərdar olan digər bir mənbə bildirib ki, "Elliott" "BP"nin yaşıl enerji xərclərini azaltmasını və külək, günəş enerjisi kimi aktivlərini satmasını istəyir.  

Mənbənin sözlərinə görə, "BP" eyni zamanda "Castrol" yağlayıcı məhsulları və yanacaqdoldurma məntəqələri şəbəkəsini satmaqla dəyəri artırmaq və səhmlərin geri alınmasını gücləndirmək imkanını da nəzərdən keçirir.  

"BP"nin keçmiş baş icraçı direktoru Bernard Luni 2020-ci ildə şirkətin neft və qaz hasilatını 40% azaltmaq və bərpa olunan enerjini sürətlə artırmaq planını açıqlamışdı. 2023-cü ildə isə "BP" bu hədəfi 25%-ə endirib.  

Akinloss vəzifəyə gəldikdən sonra bərpa olunan enerji sahəsinə yatırımları ləngidib və xərcləri azaltmaq məqsədilə işçi heyətinin 5%-ni ixtisar edəcəyini elan edib.  

"Bank of America" analitiklərinin sözlərinə görə, "BP" çərşənbə günü aşağı karbonlu illik kapital xərclərini 2-3 milyard dollar azaltmaq planını da açıqlaya bilər. Şirkətin 2024-cü il üzrə ümumi kapital xərcləri 16,24 milyard dollar olub.  

Rəhim