Uçan avtomobil konsepti uzun illərdir maraq doğursa da, onun gündəlik həyatda istifadəsi üçün texniki və hüquqi maneələr hələ də aradan qaldırılmayıb. Lakin ABŞ-ın "Alef Aeronautics" şirkəti bu sahədə iddialı görünür və təxminən 235 min dollara satışa çıxarmağı planlaşdırdığı uçan avtomobili ilə böyük ümidlər bəsləyir.

Valyuta.az xəbər verir ki, şirkət avtomobilin necə işlədiyini nümayiş etdirmək üçün ictimai bir yolda sınaq uçuşu həyata keçirib. Görünən odur ki, bu test üçün lazımi icazə alınmayıb. Texniki baxımdan avtomobil yolda hərəkət edərkən maneələri aşmaq üçün havaya qalxmaq imkanına malikdir.

Bu cür avtomobillərin rəsmi olaraq yollarda və ya hava məkanında istifadəsinə icazə verilməməsinin bir sıra mühüm səbəbləri var. Çünki yerüstü avtomobil idarəçiliyi ilə uçan bir nəqliyyat vasitəsini idarə etmək tamamilə fərqli fiziki qanunlara tabedir.

Avtomobil havaya qalxdıqda artıq küləyin təsiri, yerin cazibə qüvvəsi və mühərrik gücü kimi amillərlə qarşılaşır. Bu cür nəqliyyat vasitələrinin havada idarə edilməsi pilot və ya helikopter sürücüsü lisenziyası tələb edir və olduqca çətindir.

Bundan əlavə, uçan avtomobillərin istismara verilməsi ciddi təhlükəsizlik riskləri daşıyır. Belə nəqliyyat vasitələrinin nəzarətsiz uçuşları ölümlə nəticələnən və maddi ziyan vuran qəzalar yarada bilər. Bu səbəbdən bir çox ölkə hələlik uçan avtomobillərə lisenziya verməkdən imtina edir.

Hazırda bu cür nəqliyyat vasitələri əsasən çox zəngin şəxslərin böyük özəl ərazilərində əyləncə məqsədilə istifadə etdiyi texnoloji "oyuncaqlar" olaraq qalır. Onların kütləvi istifadəsi üçün süni intellektlə idarə olunan avtonom sistemlərin inkişaf etdirilməsi vacibdir.

Əgər süni intellekt və avtonom idarəetmə sistemləri bu sahədə tətbiq olunarsa, dünya "Beşinci Element" və ya "Ulduz Döyüşləri" filmlərində gördüyümüz, uçan avtomobillərlə dolu futuristik bir mənzərəyə qovuşa bilər. Lakin insan nəzarətində olan uçan avtomobillərin sərbəst şəkildə istismarı hələlik praktik olaraq mümkün görünmür.

Paşa Məmmədli