"Apple", Böyük Britaniya hökumətinin istifadəçi məlumatlarına giriş üçün xüsusi bir "arxa qapı" tələb etdiyi barədə xəbərlərdən sonra, bulud məlumatları üçün ən inkişaf etmiş ucdan-uca şifrələmə funksiyasını ləğv etdiyini açıqlayıb.  

Valyuta.Az xəbər verir ki, şirkət cümə günü verdiyi bəyanatda bildirib ki, "Advanced Data Protection" etmiş funksiyası Böyük Britaniyada yeni istifadəçilər üçün artıq əlçatan olmayacaq və mövcud istifadəçilər də tədricən bu təhlükəsizlik funksiyasını söndürməli olacaqlar. Bu seçim, istifadəçi məlumatlarının geniş spektrini qorumaq üçün əlavə təhlükəsizlik təmin edirdi.  

Hökumətlər adətən cinayət işlərinin araşdırılması məqsədilə texnologiya şirkətlərindən istifadəçi məlumatlarını tələb edirlər, lakin Böyük Britaniyanın ötən ay irəli sürdüyü bu tələb xüsusilə genişmiqyaslı hesab edilir.  

Böyük Britaniya bu cür tələbləri 2016-cı ildə qəbul edilən "İstintaq səlahiyyətləri haqqında akt" çərçivəsində irəli sürür. Bu qanun mövcud səlahiyyətləri birləşdirərək hökumət orqanlarına rabitəni ələ keçirmək və məlumat əldə etmək imkanı verir. Təhlükəsizlik rəsmiləri bildiriblər ki, məlumatların şifrələnməsi cinayətkarları ələ keçirməyi çətinləşdirir, lakin texnologiya şirkətləri uzun müddətdir ki, istifadəçilərin məxfiliyinin qorunmasının vacibliyini vurğulayırlar.  

"Apple" bəyanatında qeyd edib: "Məlumat sızıntılarının və müştəri məxfiliyinə təhdidlərin artmaqda olduğu bir vaxtda, Böyük Britaniya müştərilərimiz üçün "ADP" qorunmasının əlçatan olmayacağı bizi ciddi şəkildə məyus edir."

"The Washington Post" qəzeti fevral ayında yayımladığı xəbərdə, Böyük Britaniya hökumətinin "Apple"dan bulud sistemində saxlanılan şifrələnmiş istifadəçi məlumatlarına genişmiqyaslı çıxış imkanı tələb etdiyini bildirmişdi.  

Böyük Britaniyanın Daxili İşlər Nazirliyinin sözçüsü məsələ ilə bağlı açıqlama verməkdən imtina edərək, "Biz əməliyyat məsələləri barədə, o cümlədən bu cür bildirişlərin mövcudluğunu təsdiqləmək və ya təkzib etmək barədə şərh vermirik" deyib.  

"Apple", Böyük Britaniya parlamentinin istifadəçi məlumatlarına giriş tələbi ilə bağlı qanun layihəsini "misli görünməmiş müdaxilə" adlandıraraq tənqid edib. Şirkət keçmişdə də oxşar hökumət tələblərinə qarşı müqavimət göstərib. 2016-cı ildə hüquq-mühafizə orqanları "Apple"dan San-Bernardino terrorçularından birinə aid şifrələnmiş "iPhone"un kilidini açmağı tələb etsə də, şirkət buna qarşı çıxmışdı.  

"Apple" cümə günü bir daha vurğulayıb ki, texnologiyalarına heç bir halda "arxa qapı" əlavə etməyəcək. Şirkət həmçinin qeyd edib ki, "iMessage", "FaceTime" və "Health" tətbiqi kimi standart olaraq ucdan-uca şifrələnmiş xidmətlər bu qərardan təsirlənməyəcək.  

Rəhim