"Meta" şirkəti icraçı rəhbərlərinə əsas maaşlarının 200%-dək bonus verilməsini nəzərdə tutan planı təsdiqləyib. 

Valyuta.Az "Business Insider"a istinadla xəbər verir ki, bu barədə dünən ABŞ Qiymətli Kağızlar və Birja Komissiyasına (SEC) təqdim edilən sənəddə bildirilib.  

Sənəddə qeyd olunub ki, bu bonus planı "şirkət rəhbərlərini əsas prioritetlərə diqqət yetirməyə motivasiya etmək və onların nəticələrinə görə mükafatlandırmaq" məqsədi daşıyan "dəyişkən nağd stimul" sistemini təqdim edir.  

Şirkətin məlumatına görə, yeni plan bonus paketinin əsas maaşın 75%-dən 200%-dək artırılmasına imkan verəcək.  

Bu dəyişiklik "Meta"nın baş direktoru Mark Zukerberqə şamil edilməyəcək. Belə praktika qeyri-adi deyil, çünki baş icraçı direktorların maaş strukturu adətən fərqli olur və əsasən səhmlər üzərində qurulur.  

Şirkət sənəddə bildirib ki, bu dəyişiklik rəhbər heyətinin əməkhaqqı bazar göstəricilərinə uyğun təhlil edildikdən sonra kompensasiya, təyinat və korporativ idarəetmə komitəsi tərəfindən təsdiqlənib. Məlum olub ki, rəhbər işçilərin ümumi nağd əməkhaqqı hədəfi, eyni vəzifəni tutan digər icraçılarla müqayisədə 15% aşağı olub.  

Yeni bonus sistemi bu rəqəmi 50%-ə çatdıracaq.  

Bu təsdiq "Meta"da daha bir ixtisar dalğası fonunda baş verib. Şirkət əməkdaşlarının təxminən 5%-ni – yəni 4 000 nəfərə yaxın işçini işdən çıxarmağı planlaşdırır.  

Zukerberq bildirib ki, ixtisarlar "aşağı göstəricili" işçiləri hədəf alır. Şirkət bu addımı "gərgin bir il" ərzində fəaliyyətini optimallaşdırmaq və süni intellekt sahəsinə böyük yatırımlar etmək məqsədilə atır.  

Rəhim