Əmanətlərin Sığortalanması Fondu (ƏSF) iki ildir ki, 1,3 milyon manatdan çox vergi borcunu ödəmir.

Valyuta.az-ın araşdırmasına görə, 20 fevral 2025-ci il tarixinə Fondun yığılmış vergi borcu 1 milyon 309,9 min manat olub. Bu isə ötən ilin sentyabr ayına olan göstəricidən 30,3% çoxdur.
 
Qeyd edək ki, ƏSF-in vergi borcu 2023-cü ilin əvvəlindən yaranmağa başlayıb. 2023-cü ilin may ayında 1 milyon 140,4 min manat təşkil edib. Başqa sözlə, Fondun vergi borcu iki il müddətində artmaqda davam edib.

Maraqlıdır ki, ƏSF ötən ilin əvvəlində açıqladığı hesabata əsasən 2021 və 2022-ci illər üzrə 100 milyon manatdan çox xalis mənfəət əldə edib. Artıq 2025-ci il olsa da, ƏSF hələ də 2023-cü ilin maliyyə hesabatını açıqlamayıb. 

Qeyd edək ki, maliyyə hesabatlarının vaxtında açıqlanmaması qayda pozuntusudur. Vergilər Məcəlləsinin 23-cü maddəsinə əsasən isə vergi borcunun gecikdirilməsinə görə sanksiyalar nəzərdə tutulub. Fond isə belə görünür ki, qaydalara məhəl qoymur.

Xatırladaq ki, ƏSF 2007-ci ildə yaradılıb. Fondun əsas məqsədi banklar iflasa uğradıqda və onların depozit qəbulu üzrə lisenziyası ləğv olunduqda bank yığımlarının əmanətçilərə qaytarılmasına zəmanət verməkdir.

Onu əlavə edək ki,  2020-ci ildən ƏSF-nin icraçı direktoru Tural Qüdrət oğlu Piriyevdir.