Günümüzdə çox insan biznes qurmaq istəyir. Belə bir fikir var ki, hər kəs az məbləğlə biznes qura bilər. Maraqlıdır, niyə bəziləri az məbləğlə biznes qurarkən digərləri çox pulu olmasına baxmayaraq, biznesdə uğurlu olmur?

Valyuta.az-a danışan “Mediamark” Rəqəmsal Agentliyinin təsisçisi Orxan Rzayev bildirib ki, bu sualın müxtəlif istiqamətdə səbəbləri, cavabları ola bilər: “Əsas məsələlərdən biri odur ki, insanlar bir bazar və ya dövriyyənin yarandığını gördükdə, bu barədə məlumatları olmamasına baxmayaraq, sadəcə populyar olduğu üçün yatırım edirlər, hətta böyük pullar xərcləyirlər, amma bir müddət sonra biznes batır. Bunun səbəbi odur ki, üzdə görünən nüanslardan əlavə görünməyən nüanslar da olur. Bəzi insanlar bizneslə məşğul olmağa başlayanda öncədən görmədikləri, hesablamadıqları müxtəlif problemlərlə qarşılaşırlar və hansısa məqamda davam gətirə bilməyərək dayanırlar. Bəzən isə, insanlar kiçik büdcə ilə uğurlu biznes qururlar. O insanlar gördüyü işin mütəxəssisi olan insanlardır. Yəni, gördüyü işi kifayət qədər araşdırıb, öyrənib bilən insanlardır. İş prosesində gözlədiyimiz və gözləmədiyimiz problemlər ortaya çıxa bilər. Kimlər ki öncədən qarşılaşa biləcəkləri problemlərə həll yolu hazırlayıbsa, planlar qurubsa, onların idarəetməsi daha rahat və biznesləri uğurlu olur”. 

Biznesdə uğurlu olmağın şərtləri var

O.Rzayev qeyd etdi ki, biznesdə uğurlu olmaq üçün bəzi şərtləri bilmək və tətbiq etmək vacibdir: “Biznes quran insanın bilik və bacarıqları, problemləri həlletmə bacarığı, çətinliklərə tab gətirmək gücü, ikinci, üçüncü, beşinci problemdə işini dayandırmaması, həll edərək növbəti addıma keçməsi və.s. faktorlar biznesin inkişaf edib-etməməsində önəmli rol oynayır. Bundan başqa, biznes qurmaq istəyən insanlar yanlış biznes, yanlış bazar seçə bilər. Bu halda insan nə qədər bacarıqlı olsa da, seçdiyi biznesə tələbat yoxdusa, yüksəlməkdə çətinlik çəkir. Biznesdə fərqli situasiya varsa, bəzən nə qədər pulun, bacarığın olsa da kifayət etməyə bilər. Sadəcə olaraq, bu, biznes işidir. Biznesə başlamağın müxtəlif aspektləri və çətinlikləri var. Biznesi detallı öyrənmək, ölçüb biçmək, yaranacaq problemləri həll etmə bacarığı və.s faktorlar da təsir edir”. 

Sərvanə Rəmixanova