"Meta" beş qitəni birləşdirəcək və qlobal yüksək sürətli bağlantı təmin edəcək 50 000 kilometrlik nəhəng sualtı kabel layihəsi "Project Waterworth"u elan edib. 

Valyuta.az xəbər verir ki, bu layihə, rəqəmsal infrastrukturun gücləndirilməsinə və süni intellekt sahəsində innovasiyaların inkişafına təkan verəcək.

Uzunmüddətli və milyardlarla dollarlıq sərmayə

"Facebook"un ana şirkəti olan "Meta" dünyanın ən uzun sualtı kabelini çəkməyi planlaşdırır. Şirkətin bir neçə ay əvvəl belə bir infrastruktur yaratmaq üçün 10 milyard dollar sərf etməyi planlaşdırdığı barədə məlumatlar sızdırılmışdı.

"Meta"nın Şəbəkə Mühəndisliyi üzrə vitse-prezidenti Qaya Naqaracan və Qlobal Şəbəkə İnvestisiyaları rəhbəri Aleks-Handra Aime layihənin “dünyanın ən uzun kabeli” olacağını və “ən yüksək tutumlu texnologiya” ilə təchiz ediləcəyini bildiriblər.

Beş qitəni birləşdirən qlobal bağlantı

"Project Waterworth" ABŞ, Hindistan, Braziliya, Cənubi Afrika və digər strateji bölgələri birləşdirməyi hədəfləyir. Layihə süni intellektin inkişafı üçün yüksək sürətli və geniş tutumlu üç yeni okean keçidi yaradaraq qlobal rəqəmsal magistralları gücləndirəcək.

Yeni kabel sistemi Afrikanın cənubundan keçərək Asiya və Avstraliya arasındakı regionda dənizin 7 000 metr dərinliyinə yerləşdiriləcək. Naqaracan və Aime bu irimiqyaslı bağlantının "Meta"nın şəbəkə infrastrukturuna daha çox nəzarət etməsinə imkan verəcəyini, eləcə də Hindistan kimi sürətlə inkişaf edən texnologiya mərkəzlərində rəqəmsal transformasiyanı dəstəkləyəcəyini bildiriblər.

"Meta"nın əvvəlki kabel layihələri

Bu layihə "Meta"nın indiyədək həyata keçirdiyi ən böyük şəbəkə layihəsi olsa da, şirkətin ilk kabel təşəbbüsü deyil. İllər ərzində "Meta" 20 fərqli sualtı kabel sistemi inkişaf etdirib. Bunlar arasında uzunluğu 45 000 km olan və əvvəlki rekorda sahib "2Africa" kabel şəbəkəsinin genişləndirilmiş versiyası da yer alır.

"Project Waterworth" dünya üzrə internet bağlantısını daha da gücləndirmək və süni intellekt tətbiqlərinin inkişafını sürətləndirmək baxımından texnologiya sektorunda mühüm bir addım kimi qiymətləndirilir.

Paşa Məmmədli