Brendin vizual kimliyini yaradan loqolar bəzən milyonlarla dollara başa gəlir. Amma niyə bəzi şirkətlər sadə bir loqoya bu qədər sərvət xərcləyir? Bahalı loqolar sadəcə dizaynerlərin işi deyil – bu proses bazar araşdırması, strateji düşüncə və brend dəyərinin artırılması ilə bağlıdır. 

Bu loqoların qiymətləri göstərir ki, güclü vizual imic yaratmaq üçün böyük investisiyalar tələb olunur. Bəzən sadə görünən bir dizaynın arxasında milyonlarla dollar dəyərində strateji düşüncə dayanır.

Valyuta.az tarixin ən bahalı 10 loqosunu təqdim edir:

“Symantec” – 1,28 milyard dollar

Loqo dizayneri: “Symantec”in daxili və xarici dizayn komandaları

“Symantec” təkcə yeni bir loqo hazırlamaq üçün bu məbləği xərcləməyib. Şirkət “Norton” brendini daha güclü və etibarlı göstərmək üçün vizual imicini tamamilə dəyişdirdi. Loqo ilə birlikdə istifadəçi etimadını artırmaq və təhlükəsizlik xidmətlərini daha professional təqdim etmək məqsədilə geniş kampaniyalar həyata keçirildi. Yeni loqonun bir hissəsi olan qızıl rəngli "checkmark" işarəsi müştərilərə güvən hissi yaratmaq üçün düşünülmüşdü.

Bu məbləğ təkcə loqoya deyil, ümumi brend kimliyinin yenilənməsinə də xərclənib.

British Petroleum (BP) – 210 milyon dollar

Loqo dizayneri: Landor Associates

BP-nin yaşıl və sarı günəbənzər loqosu ekoloji imic yaratmaq üçün hazırlanmışdı. Şirkət özünü daha ekoloji dost enerji təminatçısı kimi təqdim etmək üçün bu loqonu və bütün vizual kimliyini dəyişdi. Yeni loqo Helios (günəş tanrısı) konsepsiyası əsasında hazırlanmışdı və BP-nin təmiz enerji sahəsindəki inkişafını simvolizə edirdi.

Lakin 2010-cu ildə baş verən Deepwater Horizon neft sızması fəlakəti BP-nin ekoloji imicini ciddi şəkildə zədələdi.

“Accenture” – 100 milyon dollar

Loqo dizayneri: Landor Associates

“Accenture” loqosu əslində çox sadədir – aşağı hərflərlə yazılmış "accenture" sözü və üstünə qoyulmuş ">" işarəsi. Bəs, bu niyə 100 milyon dollara başa gəldi?

Loqonun yaradılması “Andersen Consulting” şirkətinin ad dəyişikliyinə getməsi ilə bağlı idi. Bu loqo gələcəyə fokuslanmış, texnoloji və innovativ yanaşmanı ifadə edən bir simvol olaraq seçilmişdi. Bunun üçün təkcə dizayn deyil, brend strategiyası və yeni bazar mövqeləndirməsi də həyata keçirildi.

 Posten Norge – 55 milyon dollar

Loqo dizayneri: "Scandinavian Design Group"

Norveçin milli poçt xidməti Posten Norge daha müasir və rəqəmsal xidmətlər təqdim edən bir brendə çevrilmək istəyirdi. Yeni loqo dizaynı təkcə vizual dəyişiklik deyil, həm də bütün xidmətlərin modernləşdirilməsinin bir hissəsi idi. Şirkət rəqəmsal poçt xidmətlərinə, logistika texnologiyalarına və müştəri təcrübəsini yaxşılaşdırmağa böyük yatırım etdi.

ANZ Bank – 15 milyon dollar

Loqo dizayneri: "M&C Saatchi"

2009-cu ildə Avstraliya və Yeni Zelandiya Bankı (ANZ) beynəlxalq bazarlarda daha güclü mövqe tutmaq üçün loqosunu yenilədi. Yeni loqo rəqəmsal dövrə uyğunlaşdırıldı və müştəriyə daha etibarlı bir imic təqdim etmək üçün minimalist və modern üslubda hazırlandı.

BBC – 1,8 milyon dollar

Loqo dizayneri: BBC Daxili Dizayn Komandası

BBC 1997-ci ildə loqosunu sadələşdirib və onu qara kvadratlar içində ağ hərflərlə əvəzləyib. BBC-nin indiki loqosu beyaz fonda qara kvadratların içində "BBC" hərfləri şəklindədir. Sadə görünsə də, onun arxasında böyük strateji iş durur.

BBC, bu loqonu yeniləyərək rəqəmsal platformalara daha yaxşı uyğunlaşdırmaq və daha çevik brend identifikasiyası yaratmaq istəyirdi.

“Pepsi” – 1 milyon dollar

Loqo dizayneri: "Arnell Group"

2008- ci ildə “Pepsi”nin yeni loqosu qızıl nisbətə, elektromaqnit sahələrinə və insan gözünün diqqətini cəlb edən dizayn prinsiplərinə əsaslanaraq yaradılıb. Yeni dizayn brendin inkişafını və dinamikliyini əks etdirmək üçün hazırlanıb.

Şirkət loqo ilə birlikdə rəqəmsal strategiyasını da yeniləmişdi.

“London 2012 Olimpiya Oyunları” – 625 min dollar

Loqo dizayneri: Wolff Olins

Bu loqo müasir, enerjili və universal dizayn prinsipləri üzərində qurulmuşdu. Lakin ictimaiyyətin bir hissəsi onu tənqid edərək çox bahalı və uyğunsuz hesab etdi.

Loqo geniş tənqid edilsə də, brendin cəsarətli imicini formalaşdırmağa kömək edib.

City of Melbourne – 625 min dollar

Melburn şəhərinin loqosu 2009-cu ildə yenilənib və bu proses 625 min dollara başa gəlib.

Loqonun modern və çoxfunksiyalı olması şəhərin inkişaf strategiyasına uyğunlaşdırılıb.

“NeXT” – 100 min dollar

Stiv Cobs-un 1986-cı ildə yaratdığı “NeXT” şirkətinin loqosu məşhur dizayner Paul Rand tərəfindən hazırlanıb. Bu minimalist loqo Cobs-a 100 min dollara başa gəlib və dizayn dünyasında ikonik hesab edilir.

Bu loqoların bu qədər bahalı olmasının əsas səbəbləri bunlardır:

Rebrendinq və Strategiya: Bahalı loqolar adətən şirkətin tam vizual və marketinq strategiyasını dəyişdirmək üçün edilir.

Qlobal Bazara Uygunluq: Loqolar beynəlxalq bazarlarda tanınmaq üçün xüsusi tədqiqatlar əsasında hazırlanır.

Dizayn və Psixologiya: İnsanların vizual yaddaşına təsir etmək üçün xüsusi rəng və formalar seçilir.

Marketinq və İctimai Münasibətlər: Loqo təkcə bir şəkil deyil, həm də şirkətin imicinin formalaşmasına kömək edən əsas vasitədir.

Maya Hüseynova