Bu ilin yanvar ayında ölkədə iqtisadi fəal əhalinin sayı 5 milyon 312 min 600 nəfər olub, onlardan 5 milyon 29 min 900 nəfəri məşğul əhali olub. 

Valyuta.az rəsmi statistik göstəricilərə istinadən xəbər verir ki, işsizlərin sayı 282 min 700 nəfər olub.

Cari il yanvarın 1-i vəziyyətinə muzdla çalışan işçilərin sayı 1 milyon 778 min 500 nəfər təşkil edib. Onların 882 min 800 nəfəri iqtisadiyyatın dövlət sektorunda, 895 min 700 nəfəri isə qeyri-dövlət sektorunda çalışıb. 

İqtisadiyyatın neft-qaz sektorunda 31 min 800 nəfər, qeyri neft-qaz sektorunda 1 milyon 746 min 700 nəfər işləyib. 

Müəssisə və təşkilatlarda muzdla çalışan işçilərin 22,8%-i məhsul istehsalı sahəsindədir. Bu sahədə ən böyük pay  7,6%-lə emal sənayesinə, ən aşağı pay isə 1,7%-lə elektrik enerjisi, qaz və buxar istehsalı, bölüşdürülməsi və təchizatı sahəsinə düşür.

Xidmət sahəsində işləyənlərin 18,5%-i ticarət, nəqliyyat vasitələrinin təmiri, 18,5%-i təhsil, 8,5%-i əhaliyə səhiyyə və sosial xidmətlər, sosial təminat, 3,5%-i turistlərin yerləşdirilməsi və ictimai iaşə, 3%-i istirahət, əyləncə və incəsənət, 2,2%-i maliyyə və sığorta, 1,1%-i daşınmaz əmlakla əlaqədar əməliyyatlar və 1,1%-i digər sahələrdə xidmətlərin göstərilməsi sahələrində işləyib.

Maya Hüseynova