2024-cü ilin nəticələri göstərir ki, Azərbaycanın bank sektorunun maliyyə göstəriciləri Cənubi Qafqazın digər iki ölkəsinin bank sektoruna uduzur və bu, son illər artıq tendensiyaya çevrilib.

Valyuta.Az xəbər verir ki, bunu iqtisadçı Samir Əliyev özünün sosial şəbəkə hesabında yazıb.

İqtisadçı qeyd edib ki, ötən il Gürcüstan bankları 1,1 milyard $, Ermənistan bankları 914 milyon $ xalis mənfəət əldə etdikləri halda Azərbaycanda bu göstərici 614 milyon $ olub. Aktivlərin və kreditləşmənin həcminə gəlincə, Azərbaycan bu göstəricilər üzrə Ermənistanı qabaqlasa da Gürcüstandan geri qalır. Gürcüstan banklarında aktvlərin həcmi 34 milyard $, Ermənistanda 27.7 milyard $, Azərbaycanda isə 31,2 milyard $ olub. 

Kreditləşmənin həcmi isə müvafiq olaraq 21,5 milyard $, 15,8 milyard $ və 16.2 $ milyard olub. Azərbaycan yeganə olaraq depozitlərin həcminə görə hər iki ölkəni qabaqlayır.

Azərbaycan bankları hətta kapitallaşma səviyyəsinə (3,9 milyard $) görə Gürcüstan (5,1 milyard $) və Ermənistandan (4,5 milyard $) geri qalır. Uyğun olaraq ROE və ROA göstəricilərinə görə də uduzuruq.

İqtisadçı həmçinin Azərbaycan iqtisadiyyatının Gürcüstandan 2,5 dəfə, Ermənistandan 3 dəfə böyük olduğunu vurğulayıb.

Qeyd edək ki, Azərbaycanda 22, Gürcüstanda 17, Ermənistanda 18 bank fəaliyyət göstərir.