Rəqsanə Məmmədova

       Rəqəmsal marketinq və biznesin inkişafı üzrə menecer

Müasir biznes mühitində sadəcə məhsul satmaq kifayət deyil. Müştərilərin bir markaya bağlanması və onu daim seçməsi üçün düzgün strategiyalar tətbiq olunmalıdır. İnsanlar təkcə məhsul almırlar, onlar bir hiss, bir dəyər, bir yaşam tərzi alırlar.Ona görə də markanı müştəriyə sevdirmək vacibdir. 

1. Brendin hekayəsini yaradın 

İnsanlar hekayələri sevirlər. Hər güclü marka arxasında unikal bir hekayə dayanır. Markanızın yaranma səbəbi, keçdiyi yol və arxasındakı dəyərlər müştərilərlə paylaşılmalıdır. 
 
2. Sosial dəyərlərə və trendlərə uyğun reklam mesajları

Marka yalnız kommersiya tipli reklamlar nümayiş etməməlidir. İnsanların yaddaşlarında qalmaq üçün cəmiyyətin trendlərinə uyğun marketinq kampaniyalar aparmalıdır. Məsələn, ekoloji məsuliyyətli bir marka olmaq, gender bərabərliyini dəstəkləmək və s 
 
3. Aydın olan vizual kimlik yaradın

Müştərilər markaları vizual olaraq tanıyır və sevirlər. Brendin loqosu, rəng palitrası, şrifti və dizayn üslubu müəyyən bir duyğu yaratmalıdır. “Apple”ın minimalizmi, “McDonalds”ın sarı-qırmızı rəngləri və ya “Tiffany & Co”nun mavi qutusu kimi vizual kimliklər uzunmüddətli yadda qalır.

4. Fərqlənin və unikal olun

Markanızı unikal edən nədir? Siz müştərilərə hansı fərqli dəyəri təqdim edirsiniz? Bu suala cavab tapa bilsəniz, müştərilər sizi daha çox sevəcək. Müştərilərin fərdi ehtiyaclarına uyğun həllər təqdim edin. Brendin səs tonu və ünsiyyət üslubu unikal olmalıdır. Rəsmi, dostyana və ya əyləncəli – markanızın xarakterinə uyğun danışın. Eksklüziv klub və ya icma yaradın. Məsələn, xüsusi müştərilər üçün VIP proqramlar və ya tədbirlər təşkil edin.

5. Sosial sübut və rəylərdən istifadə edin

Müştərilər qərar verərkən başqalarının fikirlərinə çox önəm verirlər. İnsanların sizin markanızı sevməsi üçün real müştərilərinizin təcrübələrini paylaşın. Müştəri rəylərini və uğur hekayələrini paylaşın.Tanınmış şəxslərin (influenserlər, ekspertlər) brendiniz haqqında danışmasına şərait yaradın.

Markanı müştəriyə sevdirən əsas faktorlar emosional bağlılıq, güclü vizual kimlik, unikal dəyərlər və daimi ünsiyyətdir. Müştərilər yalnız məhsul almırlar – onlar bir hiss, bir həyat tərzi alırlar. Əgər brendiniz onlara bu hissi verə bilirsə, onda onlar sizi sevməyə və daim seçməyə davam edəcəklər.