Bu gün səhər ticarət sessiyasında "BP"nin (BP.L) səhmləri 7% bahalaşaraq avqustdan bəri ən yüksək səviyyəyə çatıb. 

Valyuta.Az xəbər verir kİ, bu artım, investor "Elliott Management"in enerji nəhəngində pay əldə etməsi və bu paydan strategiya və idarə heyətində dəyişikliklər tələb etmək üçün istifadə edəcəyi gözləntiləri ilə bağlıdır.  

Saat 09:01 GMT-yə (Bakı vaxtı ilə 13:01) olan məlumata görə, "BP"nin səhmləri 7% bahalaşaraq 462,85 pensə çatıb və 2023-cü ilin fevralından bəri ən böyük günlük artımını qeydə almaq üzrə idi.  

Ötən il "BP"nin səhmləri təxminən 16% dəyər itirib. Müqayisə üçün, digər enerji şirkətlərindən "Shell" (SHEL.L) 4% geriləyib, "ExxonMobil" (XOM.N) isə 8% dəyər qazanıb.  

""BP"nin rəqibləri ilə müqayisədə zəif göstəricilərini nəzərə alsaq, istənilən aktiv investor, ən azı, idarə heyətinin sədrinin dəyişdirilməsini tələb edərdi", – "RBC Capital Markets" analitiki Birac Borkhatare deyib.  

"BP"nin baş icraçı direktoru (CEO) Mürrey Oçinkloss investorların şirkətin strategiyasına inamını bərpa etməyə çalışır. O, 2023-cü ilin sentyabrında istefa verən sələfi Bernard Lunin yerinə keçib.  

Borkhatareinin sözlərinə görə, strateji biznes nəzərdən keçirmələri çərçivəsində "BP"nin əsas neft və qaz bölməsinin bəzi keçid enerjisi seqmentlərindən ayrılması istiqamətində təzyiqlər ola bilər. Bunun məqsədi bu sahələrə sərmayənin minimallaşdırılması ola bilər.  

Qeyd edək ki, "BP" sabah IV rüb üzrə maliyyə hesabatını açıqlayacaq. Şirkət ötən ay xəbərdarlıq edərək nəticələrinin zəif ola biləcəyini bildirmişdi.  

Bundan əlavə, "BP" investorlara təqdimat gününü fevralın 11-dən fevralın 26-na qədər təxirə salıb. Buna səbəb Oçinklossun tibbi prosedur keçirməyə ehtiyacının olması göstərilib.  

Oçinklossun bu kapital bazarları günündən (CMD) istifadə edərək yeni strategiyasını elan edəcəyi gözlənilir.  

O, ötən ilin yanvarında vəzifəyə keçdikdən sonra "BP"nin bərpa olunan enerji və azkarbonlu layihələrə yatırımlarını yavaşladıb və yüksək gəlirli neft və qaz layihələrinə üstünlük verməyə başlayıb.  

""BP"də "Elliott"un aktiv mövqe tutması barədə xəbərlər maraqlı bir vaxta təsadüf edir, çünki CMD-yə cəmi iki həftə qalıb. Şirkət rəhbərliyi artıq bu tədbirə qədər təzyiq altındaydı – əgər bu məlumat doğrudursa, təzyiq daha da artacaq", – "TD Cowen" broker şirkətinin analitikləri bildiriblər.  

"Elliott" təxminən 70 milyard dollarlıq aktivləri ilə dünyanın ən nüfuzlu aktivist investorlarından birinə çevrilib.  

""Elliott"un əvvəlki təcrübəsini nəzərə alsaq, onun "BP"yə müdaxiləsinin idarə heyətində dəyişikliklərə, portfelin yenidən strukturlaşdırılmasına və sərmayələrin əsasən hasilat layihələrinə yönləndirilməsinə səbəb ola biləcəyini düşünürük. Bu da sərbəst pul axınının maksimum artırılmasına xidmət edəcək", – "Jefferies" analitiki Cakomo Romeo qeyd edib.  

Rəhim