ABŞ Maliyyə Nazirliyi cümə axşamı İranın neft sənayesinə qarşı yeni sanksiyalar tətbiq etdiyini elan edib.

Valyuta.Az xəbər verir ki, sanksiyalar milyonlarla barrel İran neftinin Çinə daşınmasını asanlaşdıran beynəlxalq şəbəkəni hədəfə alıb.  

Maliyyə Nazirliyinin Xarici Aktivlərə Nəzarət Ofisinin ("OFAC") açıqlamasına görə, sanksiyalar İran Silahlı Qüvvələrinin Baş Qərargahının neft tədarükünü həyata keçirdiyi vasitəçi şirkət olan "Sepehr Energy"ni hədəf alıb. Sanksiyalar Çində, Hindistanda və Birləşmiş Ərəb Əmirliklərində fəaliyyət göstərən bəzi şəxslər və qurumlarla yanaşı, bəzi gəmiləri də əhatə edir.  

"OFAC" bəyan edib ki, İran Silahlı Qüvvələrinin Baş Qərargahına bağlı olan "Sepehr Energy" və onun törəmə şirkətləri ticarətini apardıqları və Çinə də daxil olmaqla xarici alıcılara göndərdikləri neftin İran mənşəyini gizlətmək üçün dənizçilik sənədlərini saxtalaşdırmaq da daxil olmaqla "aldadıcı üsullardan" istifadə ediblər.  

"OFAC" hər il qanunsuz neft satışlarından milyardlarla dollar gəlir əldə edildiyini və İranın bu vəsaitləri regional fəaliyyətlərini maliyyələşdirmək, eləcə də HƏMAS, husilər və "Hizbullah" da daxil olmaqla bir sıra silahlı qrupları dəstəkləmək üçün istifadə etdiyini qeyd edib.  

ABŞ maliyyə naziri Skott Bessent İranın bu vəsaitləri nüvə proqramını inkişaf etdirmək, eləcə də ölümcül ballistik raketlər və hərbi pilotsuz uçuş aparatları istehsal etmək üçün istifadə etdiyini bildirib.  

Bessent vurğulayıb: “ABŞ İranın bu zərərli fəaliyyətlər üçün maliyyə mənbələri əldə etmək cəhdlərini aqressiv şəkildə hədəfə almaqda qətidir.”  

ABŞ Dövlət Departamentinin sözçüsü Temmi Brüs isə ABŞ-nin İranın dağıdıcı və sabitliyi pozan davranışlarına göz yummayacağını bildirib. Brüs əlavə edib: “Rejimi sabitliyi pozan fəaliyyətlərə və sivil dünyanı təhdid edən nüvə silahı axtarışına görə məsuliyyətə cəlb etmək üçün bütün mövcud vasitələrdən istifadə edəcəyik.”  

ABŞ prezidenti Donald Tramp bu həftənin əvvəlində Tehranı nüvə proqramından imtina etdirməyə yönəlmiş maksimum təzyiq siyasətini nəzərdə tutan sərəncam imzalayıb. İran isə nüvə proqramını dinc məqsədlərlə həyata keçirdiyini iddia edir.  

İranın vitse-prezidenti Məhəmməd Cavad Zərif Tehran hökumətinin nüvə silahı əldə etməyə çalışdığı fikrini rədd edib və İran ilə Qərb ölkələri arasında münasibətləri yaxşılaşdırmaq üçün danışıqlar aparılması ideyasına dəstək siqnalı verib.  

Rəhim