Çinin telekommunikasiya və smartfon nəhəngi "Huawei" ABŞ-nin şirkətin yüksək texnologiyalara çıxışını məhdudlaşdırmasına baxmayaraq, bazar payını artırmağa davam edir.  

Yerli dövlət mediasının məlumatına görə, "Huawei"nin gəliri 2024-cü ildə 860 milyard yuanı (118,27 milyard dollar) ötüb. 

Valyuta.Az "CNBC"yə istinadən xəbər verir ki, bu barədə çərşənbə günü şirkətin sədri Hovard Lyanq məlumat verib.

Bu, 2023-cü illə müqayisədə gəlirin 22 % artması və 2016-cı ildə qeydə alınan 32 %-lik artımdan sonra ən sürətli yüksəlişdir. 

Lyanq yerli hökumət konfransında çıxışı zamanı "Huawei"nin istehlakçı biznesinin "yenidən artım trayektoriyasına qayıtdığını", avtomobil həlləri sahəsində isə "sürətli inkişafın" müşahidə olunduğunu bildirib. Onun sözlərinə görə, şirkətin əsas gəlir mənbəyi olan informasiya və kommunikasiya texnologiyaları biznesi "sabit qalıb".  

Qeyd edək ki, 2019-cu ildən etibarən ABŞ "Huawei"nin Amerika tədarükçülərindən qabaqcıl 5G çipləri və "Google"un "Android" əməliyyat sistemi kimi texnologiyalara çıxışını məhdudlaşdırıb.  

Şirkətin gəliri 2020-ci ildə demək olar ki, artmayıb, 2021-ci ildə isə 29%-ə yaxın azalma qeydə alınıb. İstehlakçı seqmenti bu məhdudiyyətlərdən ciddi zərər görsə də, 2023-cü ildə illik 17 % artımla 251,5 milyard yuana yüksəlib. Bununla belə, bu göstərici hələ də 2020-ci ildəki zirvənin yalnız yarısından bir qədər çoxdur.  

"Canalys"in məlumatlarına görə, "Huawei"nin Çində smartfon satışları 2023-cü ildə 37 % artaraq bazar payına görə dördüncü yerdən ikinci yerə yüksəlib. "Apple" isə satışlarının 17 % azalması fonunda üçüncü yerə enib. 2024-cü ildə isə bazar payına görə lider "Vivo" olub.  

Şirkət 2023-cü ildə "Mate 60 Pro" modelini Çində təqdim etməklə smartfon bazarına dönüş edib. Rəylərə əsasən, cihaz qabaqcıl yarımkeçirici çip sayəsində 5G-yə yaxın yükləmə sürəti təklif edib.  

Bir ildən bir qədər çox müddət sonra "Huawei" tamamilə özünün inkişaf etdirdiyi "HarmonyOS NEXT" əməliyyat sisteminə sahib "Mate 70" smartfon seriyasını təqdim edib.  

Rəhim