Köhnə binalarda xüsusilə Stalinka layihəli binalarda yaşayan sakinlərdən Mənzil İstismar Sahələri tərəfindən zibil pulu ilə yanaşı “istismar yığımı” adlanan əlavə ödəniş tələb olunur. Bu ödəniş yalnız nağd şəkildə qəbul edilir, bank vasitəsilə ödənilmir.

Yəni vətəndaşlardan “istismar yığımı” adlanan əlavə ödənişin tələb olunması nə qədər doğrudur?

Əmlak məsələləri üzrə ekspert Ramil Osmanlı Valyuta.az-a bildirib ki, Azərbaycanda mənzil idarəçiliyi ilə bağlı ciddi problemlər mövcuddur, qeyd edilən məsələ də bunun nəticəsindən biridir:

“Xüsusilə, Mənzil İstismar Sahələrinin (MİS) hüquqi statusunun qeyri-müəyyən olması və onların fəaliyyətinin qanunvericiliklə tənzimlənməməsi bu sahədə bir sıra suallar yaradır. Köhnə yaşayış fondlarının əksəriyyətində mənzil idarəçiliyi formaları müəyyən olunmayıb və seçilməyib. Nəticədə bu binaların idarə olunması təşkil edilmir. Hazırda isə bu funksiyanı “Mənzil İstismar Sahələri” adlanan qurumlar icra edir. Lakin əsas problem ondadır ki, yerli bələdiyyələr bu prosesə nəzarət etməyə maraq göstərmirlər. Onlar əsas diqqətlərini yalnız vergi yığımına, xüsusilə əmlak vergisinin toplanmasına yönəldiblər. Halbuki, qanunvericiliyə əsasən bələdiyyələr mənzil təsərrüfatı sahəsində də məsuliyyət daşımalıdırlar”.

R.Osmanlı digər ciddi problemin isə MİS-lərin yığdıqları vəsaitin şəffaf olmaması ilə bağlı olduğunu qeyd edib:

“Sakinlərdən müəyyən məbləğ toplanır, lakin bu vəsaitlərin hara və necə xərcləndiyi bəlli deyil. Çünki proses əsasən nağd şəkildə aparılır və toplanan məbləğin necə müəyyən edildiyi də aydın deyil. Bu problemlər təkcə "Stalinka" tipli binalara deyil, ümumiyyətlə, əksər köhnə yaşayış fondlarına aiddir”.

“Düşünürəm ki, qarşıdakı 3-4 il ərzində bu sahədə müəyyən islahatlar aparılacaq və problemlər tədricən həllini tapacaq. Bunun üçün ilk növbədə mənzil idarəçiliyinin hüquqi əsaslarının dəqiq müəyyən edilməsi, şəffaf idarəetmə mexanizmlərinin tətbiqi və yerli idarəetmə qurumlarının məsuliyyətinin artırılması vacibdir” – deyə ekspert bildirdi.

Maya Hüseynova