Azərbaycan, Rusiya və İran nazirlərinin görüşü keçiriləcək

Azərbaycan, Rusiya və İranın xarici işlər, nəqliyyat və energetika nazirlikləri, eləcə də gömrük xidməti nümayəndələri "Şimal-Cənub" beynəlxalq nəqliyyat dəhlizinin Rəşt-Astara dəmir yolu hissəsinin tikintisini müzakirə etmək üçün görüş keçirəcəklər. 

Valyuta.Az xəbər verir ki, bu barədə İranın Moskvadakı səfiri Kazım Cəlali jurnalistlərə açıqlamasında bildirib.  

"Biz yaxın gələcəkdə İran, Rusiya və Azərbaycanın xarici işlər nazirləri, nəqliyyat nazirləri, energetika nazirləri və gömrük xidmətlərinin rəhbərlərinin iştirakı ilə üçtərəfli görüş keçirməyi planlaşdırırıq", – deyə o bildirib.  

Diplomatın sözlərinə görə, layihənin həyata keçirilməsinə dair sazişin 2025-ci ilin mart ayına qədər imzalanması nəzərdə tutulur.  

Qeyd edək ki, 17 may 2023-cü il tarixində Rusiya və İran Rəşt-Astara dəmir yolu hissəsinin birgə inşası barədə saziş imzalayıb. Bu layihə "Şimal-Cənub" beynəlxalq nəqliyyat dəhlizinin quru hissələrinin birləşdirilməsinə və "Transxəzər" marşrutunun iqtisadi səmərəliliyinin artırılmasına imkan yaradacaq. Layihənin ümumi dəyəri 1,6 milyard avro təşkil edir və onun icrası üçün Rusiya 1,3 milyard avro həcmində dövlət krediti ayıracaq.  

Rəhim