"Samsung Electronics Co." qlobal bazarda yaddaş çiplərinə tələbatın azalmasına baxmayaraq, IV rübdə ötən ilin eyni dövrü ilə müqayisədə 20 faizdən çox xalis mənfəət əldə edib və bazar gözləntilərini üstələyib.

Valyuta.Az "Yonhap" agentliyinə istinadla xəbər verir ki, şirkətin açıqladığı maliyyə hesabatına əsasən, oktyabr-dekabr dövründə xalis mənfəət 7,75 trilyon von (5,4 milyard ABŞ dolları) təşkil edib ki, bu da bir il əvvəllə müqayisədə 22,2 % çoxdur.  

Əməliyyat mənfəəti illik 129,9 % artaraq 6,49 trilyon von (4,5 milyard dollar), satışlar isə 11,8 % yüksələrək 75,78 trilyon von (52,7 milyard dollar) olub.  

Bu göstəricilər bazar gözləntilərindən yüksək olub. "Yonhap Infomax" maliyyə məlumat şirkətinin apardığı sorğuya əsasən, analitiklər xalis mənfəətin orta hesabla 5,69 trilyon von (3,96 milyard dollar) olacağını proqnozlaşdırırdı.  

Bununla belə, əməliyyat mənfəəti bazar proqnozundan 15,7 % aşağı olub. Bu, fərdi kompüterlər və İT cihazları üçün yaddaş çiplərinin satışının zəifləməsi, eləcə də yüksək ötürmə qabiliyyətinə malik yaddaş ("HBM") kimi süni intellekt məhsullarının gözləniləndən zəif performansı ilə izah edilir.  

Şirkətin əsas gəlir mənbəyi olan yarımkeçirici biznesi dekabr ayına qədər olan üç aylıq dövrdə 30,1 trilyon von (20,9 milyard dollar) satışla 2,9 trilyon von (2 milyard dollar) əməliyyat mənfəəti əldə edib.  

IV rübdə yaddaş çiplərinin satışları, əsasən "HBM" çipləri və yüksək sıxlıqlı "DDR5" məhsullarının artan satışları nəticəsində "DRAM" qiymətlərinin yüksəlməsi hesabına rekord həddə çatıb.  

Bununla belə, əməliyyat mənfəəti əvvəlki rüblə müqayisədə bir qədər azalıb. Bu, tədqiqat və inkişaf ("R&D") xərclərinin artması və zavod genişləndirilməsi üçün ilkin xərclərin yüksəlməsi ilə əlaqələndirilir.  

Şirkətin mobil cihazlar, televizorlar və məişət texnikasını əhatə edən bölməsi IV rübdə 40,5 trilyon von (28,2 milyard dollar) satış və 2,3 trilyon von (1,6 milyard dollar) əməliyyat mənfəəti əldə edib.  

Rəhim