Köhnə Avropa xüsusi bir auraya malikdir. Təsəvvür edin ki, qədim binalarla əhatələnmiş bir meydanda qəhvə içmək, dar küçələrdə gəzişmək və ya bir qalanın gizli keçidlərində itib-batmaq... Baharın yaxınlaşması ilə birlikdə səyahət planlarını düşünmək vaxtıdır. 

Valyuta.az xəbər verir ki, əgər küçələrdə izdiham olmadan şəhərin gözəlliyini yaşamaq istəyirsinizsə, "Travel Off Path" nəşri bir neçə maraqlı istiqamət təklif edir.

Qdansk, Polşa

Baltik dənizi sahilində yerləşən Qdansk ən çox şimal manerizmi üslubunda olan fasadları ilə tanınan rəngarəng bir liman şəhəridir. Əzəmətli qırmızı kərpicli katedralları və bəzəkli binaları ilə şəhərin tarixi orta əsrlərə qədər uzanır.

Qədim şəhər hissəsi turistlərə çoxsaylı tarixi abidələr təqdim edir. Burada rahat kafelər, məşhur Fahrenheit termometri (əgər bilmirdinizsə, Fahrenheit temperatur şkalasının yaradıcısı Qdanskdan olub) və Avropada ən yaxşı qorunmuş orta əsr ticarət kranı yerləşir.

Havanın isinməsi ilə birlikdə Mottlava çayı boyunca qayığa minmək əla seçim ola bilər. Bu çay Qdanskın ürəyindən keçərək, II Dünya müharibəsinin rəsmi olaraq başladığı Vesteryatte yarımadasına qədər uzanır.

Ruan, Fransa

Parisin şimalında, cəmi bir saatlıq məsafədə yerləşən Ruan şəhəri, qatarla asanlıqla çatmaq mümkün olan sakit bir destinasiya sayılır.

Burada müxtəlif rəngli taxta karkaslı binalar, dar piyada yolları və möhtəşəm qotik katedrallar var. Ruanın ən məşhur tikilisi Milan kafedralından da yüksək olan gotik üslublu Ruan Katedrali və şəhərin məşhur astronomik saatıdır.

Bundan başqa, tarixi Vye-Marşe meydanı da məhz burada yerləşir - məşhur fransız qəhrəmanı Janna d'Ark məhz bu yerdə tonqalda yandırılıb.

Brno, Çexiya

Praqa turistlərin diqqət mərkəzində olsa da, Çexiyanın ikinci böyük şəhəri olan Brno da az tanınsa da, bir o qədər maraqlı və cəlbedicidir.

Brno qədim tarixi ilə seçilən bir məkandır. Burada XIV əsrə aid Şpilberk qalası, hündürlüyü ilə şəhərə hökm edən Müqəddəs Pyotr və Pavel katedrali və Paris katakombalarına bənzər, 50 min insanın qalıqlarının saxlandığı Müqəddəs Yakov kilsəsinin kriptası yerləşir.

Vilnüs, Litva

Litvanın paytaxtı Vilnüs, kiçik ölçüsünə baxmayaraq, nağıldan çıxmış kimi görünən sakit və gözəl bir şəhərdir.

Burada diqqətçəkən məkanlardan biri də Ujupis adlı rayondur. 1997-ci ildə bu məhəllə zarafatla özünü müstəqil elan edib və öz konstitusiyasını qəbul edib. Həmin konstitusiyada belə qeyri-adi bəndlər var: "İnsan tənbəllik etməyə və heç nə etməməyə haqqı var", "İtin it olmağa haqqı var".

Ujupis həmçinin gənclərin sevimli məkanlarından biri sayılır. Burada alternativ mədəniyyət və incəsənət səhnəsi inkişaf edib, çoxsaylı barlar və incəsənət sərgiləri təşkil olunur.

Avropada həftəsonu səyahətləri üçün digər seçimlər

Əgər həftəsonunuzu Avropada keçirməyi planlaşdırırsınızsa, mütəxəssislər Lüksemburq şəhərini tövsiyə edirlər. Bu kiçik ölkə Fransa, Belçika və Almaniya ilə həmsərhəd olub, tarixi memarlığı və sıx meşələri ilə diqqət çəkir.

Digər bir maraqlı seçim isə Sloveniyanın paytaxtı Lyublyanadır. Kiçik olmasına baxmayaraq, Lyublyana orta əsr qalaları, meşəlik təpələr və velosipedlə kəşf ediləcək gözəl yerlər təklif edir.

Paşa Məmmədli