Azərbaycanın ən böyük dövlət bankı ABB-nin rəhbərliyi 2023-cü ildə 18,44 milyon manat gəlir əldə edib. 

Valyuta.az xəbər verir ki, bu, əvvəlki ilə nisbətən 20% və ya 3,02 milyon manat çoxdur. Belə ki, 2022-ci ildə bankın rəhbərliyinin gəlirləri 15,42 milyon manat təşkil edib. Bu bankın işçi heyətinə ödənişlərin 9,8%-ni təşkil edib. Belə ki, ABB 2023-cü ildə işçilərə 188,1 milyon manat ödəniş edib. 

Bankın açıqlamasına görə, rəhbərliyə ödəniş Bankın İdarə Heyətinə, İcraçı direktorlarına və departament rəhbərlərinə ödənilən ümumi məbləğdir. ABB-nin İdarə Heyəti sədr Abbas Hüseynovla birlikdə 7 nəfərdən ibarətdir. Baş direktorlarının sayı isə 4-dür. Bankın ümumilikdə isə 26 departamenti fəaliyyət göstərir. Ümumilikdə bu məbləğ 50 nəfərə ödənilib. 

Təxmini hesablamalara görə, 2023-cü ildə bank rəhbərliyində təmsil olunan hər bir şəxsin orta illik gəliri 341 min manat təşkil edib. 2022-ci il üzrə bu rəqəm 308 min manat təşkil edib. 
Xatırladaq ki, ABB 1992-ci ildə yaradılıb, onun nizamnamə kapitalı 1 mlrd. 281,3 mln. manat təşkil edir. Bank 2024-cü ildə ilk dəfə kütləvi səhm buraxılışı (İPO) həyata keçirib və səhmdarlarının sayını 35 minə çatdırıb.