Tramp administrasiyasının yeni sərəncamları bir sıra mühüm dəyişiklikləri əhatə edir. Bu addımlara 75 günlük TikTok möhlətinin verilməsi, 2021-ci ilin 6 yanvar hadisələrinə görə təqsirləndirilən şəxslərin əfv edilməsi, Bayden dövrünün müxtəlif sahələrdəki 78 sərəncamının ləğvi və ABŞ-ın yenidən Paris Sazişindən çıxarılması daxildir.

Müşahidəçilərin fikrincə, Trampın bazar ertəsi imzaladığı bəzi sərəncamlara məhkəmədə etiraz ediləcəyi gözlənilir. Bununla belə, ticarət və tariflərlə bağlı sərəncamların daha konkret olmaması diqqət çəkib. Tramp fevralın 1-dək Meksika və Kanadaya tariflərin tətbiq edilə biləcəyini, eləcə də idxalla bağlı daha geniş tədbirlər nəzərdən keçirdiyini vurğulayıb.

Valyut.az “Bloomberg”ə istinadən Tramp administrasiyasının dəyişikliklərini təqdim edir:

“TikTok”

Tramp “TikTok”a qarşı tədbirləri müvəqqəti dayandıraraq şirkətə və onun Çinli sahibi “ByteDance Ltd.”ə ABŞ-ın milli təhlükəsizlik narahatlıqlarını həll etmək üçün 75 günlük müddət verib.

“Tariflər"

Yeni administrasiya ABŞ-ın Çin, Kanada və Meksika ilə ticarət əlaqələrini yenidən nəzərdən keçirmək niyyətindədir. Tramp "Amerika işçilərini və ailələrini qorumaq üçün dərhal ticarət sistemimizin əsaslı təmirinə başlayacağam" deyə bildirib.

O, Meksika və Kanadaya 25%-ə qədər tarif tətbiq etməyi, eləcə də "Xarici Gəlir Xidməti" adlanan yeni bir struktur vasitəsilə tariflərin yığılmasını planlaşdırır.

Fövqəladə inflyasiya

Administrasiya mənzil, səhiyyə və enerji xərclərini azaldacaq tədbirləri prioritet kimi müəyyən edib.

İmmiqrasiya

Tramp administrasiyası immiqrasiya siyasətində ciddi dəyişikliklər planlaşdırır:

Sərhəd təhlükəsizliyi: Cənub sərhədində milli fövqəladə vəziyyət elan edilib və sərhəd təhlükəsizliyi üçün silahlı qüvvələrin yerləşdiriləcəyi bildirilib.

Deportasiyalar: Cinayət törətmiş milyonlarla immiqrantın deportasiyasına başlanacaq.

Doğum hüququ vətəndaşlığı: Müvəqqəti statusa malik şəxslərin ABŞ-da doğulan uşaqlarına avtomatik vətəndaşlıq hüququnun ləğvi nəzərdə tutulub.

Enerji və iqlim

Tramp Bayden administrasiyasının iqlim siyasətini tamamilə ləğv edərək:

Yerli enerji istehsalını artıracaq.

Strateji Neft Ehtiyatını artırmağı və enerji ixracını genişləndirməyi planlaşdırır.

Külək stansiyaları və elektrik avtomobilləri ilə bağlı tənzimləmələri dayandırır.

Mədəniyyət və cins siyasəti

Administrasiya yalnız iki cinsin, kişi və qadının rəsmi siyasətə daxil edilməsini tələb edən sərəncam imzalayıb. Hökumətin bütün sahələrində müxtəliflik təşəbbüslərinə son veriləcək.

Digər tədbirlər

Tramp Ümumdünya Səhiyyə Təşkilatından çıxmaq barədə sərəncam imzalayıb.
Federal işçilərin uzaqdan işləməsinə son veriləcək və işə qəbul dondurulacaq.

Əvəz Həsənov