2025-ci il yanvarın 1-dən etibarən "WhatsApp" artıq "Android KitKat" və əməliyyat sisteminin əvvəlki versiyaları ilə işləyən bir sıra köhnə "Android" smartfonlarında dəstəklənməyəcək. 

Valyuta.az xəbər verir ki, bu barədə "GSMArena "məlumat yayıb.

Söhbət 10 ildən çox əvvəl buraxılmış "Samsung", "Motorola", HTC, LG və "Sony"nin bir vaxtlar məşhur olan cihazlarının ən azı 19 modelindən gedir. Onların arasında "Samsung Galaxy S3" və "Note 2", birinci nəsil "Motorola Moto G", "HTC One X", "LG Optimus G" və "Nexus 4", eləcə də bir neçə "Sony Xperia" modeli var.

"Meta" korporasiyasının qərarı "WhatsApp"ın yeni funksiya və imkanlarının, o cümlədən daha müasir avadanlıq tələb edən süni intellektə əsaslanan funksiyaların dəstəklənməsi zərurəti ilə bağlıdır. Bu cihazların istifadəçilərinə 1 yanvar 2025-ci ilə qədər bütün "WhatsApp" məlumatlarını daha yeni cihazlara köçürmələri tövsiyə olunur, əks halda söhbət tarixçəsi və media faylları geri qaytarıla bilməyəcək şəkildə itiriləcək.

"Meta" artıq 15.1 versiyasından köhnə iOS sistemli cihazlar üçün dəstəyi 2025-ci ilin mayında başa çatacaq köhnə "iPhone" modelləri ilə bağlı oxşar qərar qəbul edib.

Paşa Məmmədli