"Google Chrome" brauzerinə süni intellekt texnologiyasına əsaslanan təkmilləşdirilmiş dələduzluqdan qoruma funksiyası əlavə olunub. 

Valyuta.az xəbər verir ki, bu barədə "Neowin" portalı məlumat yayıb. Yenilik "X" sosial şəbəkəsinin (əvvəlki adı Twitter) istifadəçisi "Leopeva64" tərəfindən aşkar edilib.

"Google Chrome Canary"nin son versiyasında "Client Side Detection Brand and Intent for Scam Detection" adlı yeni bir funksiya aktivləşdirilib. Bu funksiya böyük dil modellərindən istifadə edərək veb məzmununu analiz edir və istifadəçi məlumatlarının məxfiliyini qoruyur, yəni bu məlumatlar "Google"a göndərilmir.

Yeni funksiyanı sınaqdan keçirmək üçün istifadəçilər:

1. "Google Chrome Canary"nin ən son versiyasını yükləməli,

2. Chrome://flags/ səhifəsinə daxil olmalı,

3. "Client Side Detection Brand and Intent for Scam Detection" funksiyasını tapıb aktivləşdirməlidirlər.

Brauzer yenidən başladıldıqdan sonra bu funksiya işlək olacaq.

Qeyd edək ki, keçən ay "Google Chrome" "Store reviews" adlı başqa bir süni intellekt əsaslı funksiya təqdim edib. Bu funksiya "Trustpilot" və "ScamAdvisor" platformalarından məhsul rəylərini ümumiləşdirərək istifadəçilərin onlayn mağazalarla təcrübələri barədə məlumat təqdim edir.

Bundan əlavə, "Google" axtarış sisteminə faylların yüklənməsi və onlar haqqında sualların verilməsi imkanını əlavə etməyi planlaşdırır. Faylı yükləmək üçün sancağın (skrepka) işarəsinə klik etməklə istifadəçilər fayl haqqında sual vermək üçün nəzərdə tutulan sahəyə yönləndiriləcək.

Paşa Məmmədli