"BP" şirkəti ABŞ-dakı təbii qaz boru kəməri şəbəkəsindəki payını satmaq məqsədilə potensial alıcılar axtarır. 

Valyuta.Az "Reuters"ə istinadən xəbər verir ki, bu barədə məsələdən məlumatlı dörd şəxs məlumat verib.  

Britaniyanın enerji nəhəngi bu satışdan 3 milyard dollara qədər gəlir əldə etməyi planlaşdırır. İki mənbənin bildirdiyinə görə, "BP" biznesdəki payının 49%-ni satmağı nəzərdən keçirir.  

Satış prosesi, "BP"nin baş direktoru Murray Oçinklosun (Murray Auchincloss) şirkətin artan borc səviyyəsini azaltmaq istiqamətində həyata keçirdiyi strategiyanın bir hissəsidir.  

Şirkət satışla bağlı şərh verməkdən imtina edib. Dörd mənbə isə bu barədə ictimaiyyətə məlumat vermək səlahiyyətinə malik olmadıqları üçün anonim qalmağı üstün tutub.  

"BP" hal-hazırda səhmlərinin dəyərinin aşağı səviyyədə qalması səbəbindən investorların təzyiqi ilə üzləşir. Onlar şirkətdən enerji keçidi strategiyasına dair narahatlıqlar fonunda daha yaxşı maliyyə göstəriciləri və daha yüksək mənfəət gözləyirlər.  

Bundan əlavə, "BP" "Lightsource BP" günəş enerjisi biznesindəki və ABŞ-dakı külək enerjisi əməliyyatlarındakı payını da satmağı planlaşdırır. Oçinklosun bu strategiyanı şirkətin nağd vəsait axınını artırmaq və borclarını azaltmaq məqsədilə yeniləyəcəyi gözlənilir.  

Şirkətin xalis borcu, aktivlərin gözləniləndən daha az dəyərə satılması səbəbindən sentyabr ayının sonunda 24,3 milyard dollara çatıb. Bu göstərici bir il əvvəl 22,3 milyard dollar idi.  

"BP"nin səhmləri bu il indiyədək 18%-dən çox dəyər itirib ki, bu da onun əsas rəqibləri ilə müqayisədə daha zəif nəticədir. "Shell"nin səhmləri ilin əvvəlindən bəri 3% ucuzlaşıb, "ExxonMobil" 14%, "Chevron" isə təxminən 7% dəyər qazanıb.  

ABŞ-ın neft və qaz boru kəməri sektoru istehsalın artması və yeni boru kəmərlərinə icazə problemləri səbəbindən mövcud aktivlərin daha dəyərli hala gəlməsi fonunda son illərdə daha çox konsolidasiyaya məruz qalıb.  

"BP"nin rəsmi veb saytına görə, şirkət ABŞ-da gündəlik 1,1 milyon barrel xam neft, təbii qaz və yanacaq daşıyan 1.500 mil (2.414 km) uzunluğunda boru kəmərlərinə sahibdir.  

Rəhim