Dünyaca məşhur "Coca-Cola”nın 1886-cı ildən bu günə qədər olan hekayəsi markanın sadəcə bir içki istehsalçısı olmaqdan çıxaraq qlobal bir ikonaya necə çevrildiyini göstərir. Bu prosesdə tətbiq edilən dizayn, marketinq və iş strategiyaları şirkətin böyüməsini və davamlı uğurunu göstərdi. 

Bəs “Coca-Cola”nın bu uğurunun əsas səbəbi nə idi? Şirkət necə dünyanın ən tanınmış markalarından birinə çevrilə bildi?

Valyuta.az “Coca-Cola”nın uğurunun arxasında duran yeddi əsas strategiyanı təqdim edir. 

1. Orijinal və test edilmiş bir formula ilə başlanğıc

John Pemberton 1886-cı ildə alkolsuz kola formulasını hazırladı. İstehlakçı rəyləri əsasında unikal bir resept yaradıldı. “Coca-Cola”nın orijinal resepti bu gün də ciddi şəkildə qorunur.

2. Loqo dizaynı zamanı fərqli şriftdən istifadə

Loqo mühasiblərin istifadə etdiyi Spencerian şriftində hazırlandı və fərqli olmaq üçün seçildi. 1923-cü ildə standartlaşdırılan loqo, məhsul və qablaşdırma dəyişsə də, həmişə eyni qaldı.

3. Fərqli şüşə dizaynı ilə satış

“Coca-Cola” 1915-ci ildə unikallığını vurğulamaq və digər markalardan seçilmək üçün fərqli bir şüşə dizaynı təqdim etdi. Yarışmada qalib gələn şüşə dizaynı ikonik oldu və bu gün də markanın bir simvolu hesab edilir.

4. Pərakəndə satıcılar üçün yüksək standartlar

Şirkət məhsulun 2 dərəcə temperaturda təqdim olunmasını tələb etdi. Bu cür standartlar “Coca-Cola”nın rəqiblərindən daha keyfiyyətli bir marka kimi tanınmasına kömək etdi.

5. 70 İl boyunca stabil qiymət

ABŞ-da 1886-cı ildən 1959-cu ilə qədər “Coca-Cola”nın bir şüşəsinin qiyməti sadəcə 5 sent idi. Bu strategiya istehlakçı bazasını genişləndirməyə imkan verdi.

6. Kampaniyalar və özünəməxsus brend səsi

“Coca-Cola” istehlakçılar arasında marka bilinirliyini artırmaq üçün genişmiqyaslı kupon kampaniyası həyata keçirdi. Şirkət həmçinin reklamlarında "Coca-Cola” İç- Ləzzətli və Təravətləndirici" şüarından istifadə etdi.

7. Françayzinq modelinin qəbulu

1889-cu ildən etibarən “Coca-Cola” şüşələmə hüquqlarını üçüncü tərəflərə verdi. Bu model sayəsində şirkət müxtəlif bazarlarda böyüməyi və yeni məhsullar istehsal etdirməyi bacardı.

“Coca-Cola”nın bu strateji yanaşmaları onun yalnız məhsul satmaqla kifayətlənməyib, qlobal səviyyədə tanınan və öz dəyərini qoruyan bir marka halına gəlməsini təmin etdi.

Davud